अक्षय कुमारच्या सूचनेनंतर महाराष्ट्र पोलिसांच्या बुटांमध्ये बदलाची शक्यता; मुख्यमंत्र्यांनी दिला सकारात्मक प्रतिसाद !

 

 Image Source:(Internet)

मुख्यमंत्री देवेंद्र फडणवीस यांनी नुकत्याच FICCI कार्यक्रमात अभिनेता अक्षय कुमार (Akshay Kumar) यांचा संवाद घेतला. या चर्चेत अक्षय कुमारने फक्त राजकीय किंवा आर्थिक मुद्यांवर नाही, तर पोलिस दलाच्या कार्यक्षमतेशी निगडित एका महत्त्वाच्या बाबीकडे लक्ष वेधले.

 

अक्षय कुमारने महाराष्ट्र पोलिसांच्या बुटांबाबत चिंता व्यक्त केली. त्यांनी म्हटले की, पोलीस जे बूट घालतात त्यात टाचे असल्यामुळे धावताना अडचणी येतात आणि तातडीच्या परिस्थितीत काम करताना अडथळा निर्माण होतो. “मी खेळाडू असल्यामुळे सांगतो की योग्य बूट असल्यास पोलिस अधिक सहज, जलद आणि सुरक्षितपणे काम करू शकतील,” असे त्यांनी नमूद केले.

अक्षय कुमारच्या या सूचना ऐकून मुख्यमंत्री देवेंद्र फडणवीस यांनी त्वरित सकारात्मक प्रतिसाद दिला. “खरंच, ही एक उपयुक्त कल्पना आहे. पोलीस बूट घालून काम करतात, पण याकडे ध्यान देण्यात आलेले नाही,” असे फडणवीस यांनी सांगितले.

यानंतर मुख्यमंत्री फडणवीस यांनी अक्षय कुमार यांना बूट डिझाइनबाबत सूचना देण्याची संधी दिली. “तुमच्या कल्पना आम्ही नक्कीच अमलात आणू. तुम्ही अॅक्शन हिरो आहात, त्यामुळे योग्य बूट कसे असावे हे तुम्हाला चांगले माहित असेल,” असे त्यांनी स्पष्ट केले.

 

मुख्यमंत्र्यांच्या सकारात्मक प्रतिक्रियेनंतर, महाराष्ट्र पोलिसांच्या बुटांमध्ये लवकरच बदल होण्याची शक्यता आहे. नवीन डिझाइन आणि आरामदायक बुट पोलीसांना धावण्यात, तातडीच्या परिस्थितीत गुन्हेगारांचा पाठलाग करण्यात आणि त्यांच्या कर्तव्याची अचूक अंमलबजावणी करण्यात मदत करतील. यामुळे पाय व पाठ यांच्यावर होणारा ताण कमी होईल आणि एकूणच कामगिरी सुधारेल.