नागपूरच्या महल भागात चोरी; ११ लाख रुपयांसह सीसीटीव्ही डीव्हीआर गायब!

 

Image Source:(Internet)

शहरातील मध्यवर्ती महल (Mahal) परिसरात चोरट्यांनी आणखी एक मोठी चोरी करून पोलिसांना आव्हान दिलं आहे. गांधी गेटजवळील ‘माधव इलेक्ट्रिक’ या दुकानात बुधवारी पहाटे अज्ञात चोरट्यांनी छत फोडून प्रवेश करत तब्बल ११ लाख रुपये आणि सीसीटीव्ही प्रणालीचा डीव्हीआर लंपास केला. या घटनेने व्यापारी वर्तुळात खळबळ माजली आहे.

 

मिळालेल्या माहितीनुसार, दुकानाचे मालक मनोज कुमार बिसेनदास खत्री यांनी मंगळवारी रात्री नेहमीप्रमाणे दुकान बंद करून घरी परतले होते. मात्र, बुधवारी सकाळी दुकान उघडताच त्यांना तिजोरीतील रोकड ठेवलेली बॅग गायब असल्याचे दिसून आले. तातडीने त्यांनी कोतवाली पोलीस ठाण्यात तक्रार दाखल केली.

 

प्राथमिक तपासात पोलिसांना हे स्पष्ट झाले की चोरट्यांनी छतावाटे आत प्रवेश करून थेट रोकड आणि डीव्हीआरवर हात साफ केला, इतर कोणत्याही वस्तूंना हात न लावता. यावरून हे चोरटे आधीपासून माहिती मिळवूनच आले असावेत, असा अंदाज पोलिसांनी व्यक्त केला आहे.

 

घटना घडलेला परिसर नेहमीच गर्दीचा असून, रात्री पोलीस गस्त असतानाही एवढी मोठी चोरी होणं म्हणजे सुरक्षेच्या व्यवस्थेवर मोठा प्रश्नचिन्ह उपस्थित झालं आहे. स्थानिक व्यापाऱ्यांनी पोलिसांनी गस्त वाढवावी, अशी मागणी केली आहे.

 

दरम्यान, कोतवाली पोलिसांनी गुन्हा नोंदवून तपास सुरू केला असून, आसपासच्या परिसरातील सीसीटीव्ही फुटेजच्या आधारे आरोपींचा मागोवा घेण्याचे प्रयत्न सुरू आहेत. पोलिसांनी काही संशयितांना चौकशीसाठी ताब्यात घेतल्याची माहितीही समोर आली आहे.