Blog : भारत न्यूझीलंडलाही क्लीन स्वीप देणार?

विकेट किपर ऋषभ पंत हा देखील असाच एक धडाकेबाज फलंदाज भारताकडे आहे. जीवघेण्या अपघातातून सावरलेला ऋषभ पंत हा जगातील सर्वात आक्रमक फलंदाज मानला जातो. आपल्या आक्रमक खेळीने सामना भारताकडे वळवण्याची ताकद त्याच्याकडे आहे. के एल राहुल हा संयमी फलंदाज मधल्या फळीचा कणा आहे. आक्रमक आणि संयमी अशा दोन्ही प्रकारच्या खेळी तो करू शकतो. त्यामुळेच ही जगातील सर्वोत्तम फलंदाजांची फळी म्हणून भारताच्या फलंदाजीकडे पाहिले जाते.

 

रविचंद्रन आश्विन आणि रवींद्र जडेजा हे भारताचे सर्वोत्तम फिरकीपटू आता केवळ फिरकीपटू नसून ते आता अष्टपैलू बनले आहेत. हे दोघे केवळ बॉलनेच नव्हे तर बॅटनेही कमाल करू शकतात हे आपण बांगलादेश विरुद्धच्या मालिकेत पाहिले आहे. त्यांच्या गोलंदाजीवर तर न बोललेलेच बरे. कसोटी मधील सर्वोत्तम फिरकी जोडी अशी त्यांची ओळख असून दोघानी मिळून ८५० च्या वर बळी घेतले आहेत. जसप्रीत बुमरा हा जगातील सर्वोत्तम वेगवान गोलंदाज भारताकडे आहे. हा गोलंदाज भल्या भल्या फलंदाजांची दांडी गुल करण्यात माहीर आहे. त्याला मोहंमद सिराज आणि नवोदित आकाश दीप यांची साथ मिळते, त्यामुळे भारताचा हा संघ जगातील सर्वोत्तम संघ मानला जात आहे.

 

अक्षर पटेल आणि कुलदीप यादव यासारखे गोलंदाज पॅव्हेलियनमध्ये बसतात, यावरून भारतीय संघात किती ताकद दिसून येते. एकीकडे भारतीय संघ भक्कम दिसत असताना न्युझीलंड संघाने मात्र त्यांचा फॉर्म गमावला आहे. श्रीलंकेने त्यांचा नुकताच पराभव केला आहे. गेल्या काही दिवसात या संघाने उल्लेखनीय असा खेळ केलेला नाही. भारतातही या संघाची कामगिरी निराशाजनक आहे. भारतात विजय मिळवून या संघाला कैक वर्ष उलटली आहेत. मागील अनेक वर्षात हा संघ भारतात विजय मिळवू शकला नाही त्यामुळे भारतीय संघ न्यूझीलंडला देखील ३ - ० असा क्लीन स्वीप देऊन विश्व कसोटी चॅम्पियनशिपच्या अंतिम फेरीत प्रवेश निश्चित करेल यात शंका नाही.