तपासासाठी मध्य प्रदेशात गेलेल्या पोलिसांच्या वाहनाचा अपघात; एकाचा मृत्यू

 

 

नागपूर : एका गुन्ह्याच्या तपासासाठी मध्य प्रदेशात गेलेल्या वाठोडा पोलिस ठाण्याच्या पथकाला अपघात झाला. त्यात एकाचा मृत्यू झाला असून दोन जण गंभीर जखमी झाले आहेत. मृत कर्मचारी यांनी नवीन घर बांधले होते. गृहप्रवेश लवकरच होणार होते. मात्र त्यापूर्वीच या कर्मचाऱ्याचा अपघाती मृत्यू झाला. वाठोडा पोलिस ठाण्यातील या घटनेमुळे पोलिस क्षेत्रात शोककळा पसरली आहे. नंदू कडू (५५) असे मृत कर्मचाऱ्याचे नाव आहे.

 

सायबर क्राईमशी संबंधित एका गुन्ह्याचा तपास करण्यासाठी वाठोडा पोलिस ठाण्याचे कर्मचारी नंदू कडू, सचिन श्रीपाद आणि राधेश्याम खापेकर हे सरकारी किंवा सार्वजनिक वाहनाऐवजी खासगी वाहनाने इंदोरला निघाले. शुक्रवारी इंदोरपासून ६०-७० किमी अंतरावर त्यांच्या वाहनाला अपघात झाला. या अपघातात नंदू कडू यांचा मृत्यू झाला. तर राधेश्याम खापेकर यांच्या खांद्याला दुखापत झाली असून त्यांना रुग्णालयात नेण्यात आले. यावेळी त्यांच्या खांद्याला फ्रॅक्चर झाल्याचे निदान झाले. मात्र, सचिनला फारशी दुखापत झाली नाही. या घटनेची माहिती पोलिस विश्वात वाऱ्यासारखी पसरली. वाठोडा पोलिस ठाण्याचे निरीक्षक चौधरी यांनी इंदोर येथे संपर्क साधून परिस्थितीची माहिती घेतली.

 

नंदू कडू यांचा मृतदेह पोस्टमॉर्टमसाठी पाठवण्यात आला. त्यानंतर अंत्यसंस्कारासाठी पार्थिव नागपुरात आणण्यात येणार आहे. त्याचवेळी राधेश्याम खापेकर आणि सचिन श्रीपाद यांना खासगी वाहनातून नागपुरात आणल्याची माहिती दिली. हा अपघात कसा घडला? त्याचा तपास सुरू झाला आहे. मात्र, ड्युटीवर तैनात असलेल्या एका पोलिसाला जीव गमवावा लागल्याने पोलिस विभागात शोककळा पसरली आहे.