Nagpur Budget 2023 : नागपूरकरांना अर्थसंकल्पात काहीसा दिलासा; कुठलीही कर वाढ नाही

 

 

नागपूर महानगरपालिकेचे प्रशासक आणि आयुक्त राधाकृष्णन बी. यांनी २०२३-२४ या वर्षाचा प्रस्तावित अर्थसंकल्प (Nagpur Budget 2023) शुक्रवारी २४ मार्च रोजी सादर केला. मनपा मुख्यालयातील छत्रपती शिवाजी महाराज नवीन प्रशासकीय इमारतीमधील आयुक्त सभागृहामध्ये पत्रकार परिषदेत मनपा आयुक्तांनी २०२३-२४ या वर्षाचा ३२६७.६३ कोटींचा अर्थसंकल्प मांडला. यावेळी अतिरिक्त आयुक्त अजय गुल्हाने, राम जोशी, मुख्य लेखा व वित्त अधिकारी विलीन खडसे उपस्थित होते.

 

मनपाच्या इतिहासातील सर्वात मोठा अर्थसंकल्प (Nagpur Budget 2023) मांडताना मनपा प्रशासक व आयुक्त राधाकृष्णन बी. यांनी अर्थसंकल्पात २०२२-२३ या वर्षातील एकूण खर्च २९१६.७४ कोटी नमूद केले. २०२३-२४ या वर्षातील हाती घ्यावयाच्या विकास कामाचे नियोजन करताना त्या कामाची तात्काळ उपयोगीता व गरज आहे त्याकडे विशेष लक्ष देण्यात आले असून विशेष महत्वाचे व तात्काळ हाती घ्यावयाच्या कामांना प्राधान्य देण्यात आले आहे.

 

मनपा आयुक्त तथा प्रशासक राधाकृष्णन बी. यांनी मांडलेल्या अर्थसंकल्पामध्ये २०२३-२४ (Nagpur Budget 2023) या वर्षात कुठलीही मालमत्ता कर वाढ नोंदविलेली नाही. याशिवाय पर्यावरणपूरक बाबींचा अवलंब करणाऱ्यांना कर सवलत देण्याची योजना अंतर्गत जे मालमत्ताधारक त्यांच्या घरी रेन वाटर हार्वेस्टिंग, सोलर पॅनल आणि कम्पोस्टिंग या त्रिसूत्रीचा अवलंब करणार त्यांना मनपाच्या मालमत्ता करामध्ये विशेष सवलत देत असलेली योजना यावर्षी सुद्धा सुरू राहिल. याशिवाय ऑनलाईन माध्यमातून चालू वर्षाचे मालमत्ता कर भरणा करणाऱ्यांना ५ टक्के सूट देण्यात येणार असल्याचे मनपा आयुक्तांनी सांगितले.

 

मनपा आयुक्त राधाकृष्णन बी. यांनी नागपूर महानगरपालिकेचे प्रशासक म्हणून शहराचा अर्थसंकल्प (Nagpur Budget 2023) लोकाभिमुख असावा, अशी संकल्पना मांडली होती. त्यानुसार त्यांनी नागरिकांनी अर्थसंकल्पासाठी सूचना सुद्धा मागविल्या होत्या. मनपा आयुक्त तथा प्रशासकांना ९७ प्राप्त सूचना अर्थसंकल्पासाठी प्राप्त झाल्या. या सूचनांपैकी जास्तीत जास्त सूचना जनसुविधांच्या दृष्टीने महत्वाच्या असल्याचे लक्षात घेता आयुक्तांनी अर्थसंकल्पात त्या सूचनांनुसार तरतूद केली आहे.