नेपाळ प्रवासी विमान दुर्घटनाग्रस्त; ४० जणांचा मृत्यू

मिळालेल्या माहितीनुसार, यती एअरलाईन्सच्या ATR-७२ विमानाने रविवारी सकाळी काठमांडूहून पोखरासाठी उड्डाण केले होते. परंतु, कास्की जिल्ह्यातील पोखरामध्ये विमान कोसळले. अपघातानंतर बचावकार्य सुरू आहे. अपघाताबाबत माहिती देताना यती एअरलाइन्सचे प्रवक्ते सुदर्शन बारतौला यांनी सांगितले की, यती एअरलाईन्सच्या विमानात एकूण ६८ प्रवासी आणि ४ क्रू मेंबर्स होते. जुने विमानतळ आणि पोखरा आंतरराष्ट्रीय विमानतळादरम्यान हे विमान कोसळले.

 

विमानाच्या अपघातानंतर या दुर्घटनेशी संबंधित अनेक व्हिडिओज आणि फोटोज सोशल मीडियावर व्हायरल होत आहेत. यामध्ये दुर्घटनेनंतर मोठ्या प्रमाणात आगीचे आणि धुराचे लोट उठताना दिसत आहे. अशा परिस्थितीत बचावकार्य करण्यात अडचणी येत असल्याचेही दिसून येत आहे. अपघातस्थळी हेलिकॉप्टरद्वारे बचाव पथक तैनात करण्यात आले आहे. दरम्यान, मृतांचा आकडा अजून वाढण्याची भीती वर्तविली जात आहे.

 

मिळालेल्या माहितीनुसार, खराब हवामानामुळे विमान डोंगरावर आदळले. लँडिंगपूर्वी झालेल्या अपघातानंतर विमानाला आग लागली. तसेच दुर्घटनाग्रस्त विमानात ५३ नेपाळी, ५ भारतीय, ४ रशियन, १ आयरिश, २ कोरियन, १ अर्जेंटिनी आणि १ फ्रेंच नागरिक विमानात होते, अशी माहिती विमानतळाच्या प्राधिकरणाने दिली आहे.