विकी-कतरिनाच्या जीवाला धोका! अज्ञाताकडून दोघांना जीवे मारण्याच्या धमक्या

 (Image Source : Internet)

 

बॉलिवूडमधील सर्वांचे आवडते स्टार कपल विकी कौशल आणि कतरिना कैफ यांच्याबद्दल एक धक्कादायक बातमी समोर आली आहे. विकी आणि कतरिना यांना एका अज्ञात व्यक्तीकडून जीवे मारण्याच्या धमक्या आल्या आहेत. यानंतर विकी कौशलने धमकी देणाऱ्या अज्ञात व्यक्तीविरोधात पोलिसांत तक्रार दाखल केली. मुंबई पोलिसांनी देखील त्या अज्ञात व्यक्तीविरुद्ध गुन्हा दाखल केला असून तपासाला सुरुवात केली आहे.

 

मिळालेल्या माहितीनुसार, एक अज्ञात व्यक्ती सोशल मीडियावर कतरिना कैफला खूप दिवसांपासून स्टॉक करत होता. पण जेव्हा विकी कौशलला त्याच्या पत्नीला म्हणजेच कतरिनाला एक व्यक्ती स्टॉक करत असल्याची माहिती मिळाली, तेव्हा त्यानेही त्या व्यक्तीला समजवण्याचा प्रयत्न केला. पण त्या व्यक्तीने ते मान्य नव्हते. या व्यक्तीचे नाव आदित्य राजपूत असल्याची माहिती समोर आली आहे. विकी कौशलने आदित्यला समजावण्याचा प्रयत्न केला. मात्र, त्या व्यक्तीने विकीला धमकी देण्यास सुरुवात केली. अखेर विकी कौशलने कठोर पाऊल उचलत आदित्य विरोधात सांताक्रूझ पोलिस ठाण्यात तक्रार दाखल केली.

 

 

 

मुंबई पोलिसांनी दिलेल्या माहितीनुसार, सांताक्रूझ पोलिस ठाण्यात अभिनेता विक्की कौशलच्या तक्रारीवरून ५०६(२),३५४(डी) आयपीसी कलम ६७ आयटी कायद्यानुसार गुन्हा दाखल करण्यात आला. एक व्यक्ती इंस्टाग्रामवर धमकावत आहे आणि धमकीचे संदेश पोस्ट करत असल्याची तक्रार विकीने केली. आरोपी त्याच्या पत्नीचा म्हणजेच कतरिनाचा पाठलाग करत आहे आणि तिला धमकावत आहे, असे विकीने सांगितले. आम्ही देखील त्या व्यक्तीविरोधात गुन्हा नोंदवला असून त्याच्याबद्दल अधिक तपशील मिळविण्याचा प्रयत्न करत आहोत, असे पोलिस म्हणाले.