नागपूरच्या पाचपावलीत हुक्का पार्लरवर पोलिसांची धाड; तिघांना अटक, ३१ हजारांचा मुद्देमाल जप्त

 

 Image Source:(Internet)

 

नागपूर : पाचपावली (Pachpaoli) पोलीस ठाण्याच्या हद्दीत सुरू असलेल्या हुक्का पार्लरवर सामाजिक सुरक्षा पथकाने धाड टाकून तिघांना अटक केली. या कारवाईत पोलिसांनी हुक्का पॉट, हुक्का फ्लेवरसह अन्य साहित्य असा सुमारे ३१ हजार रुपयांचा मुद्देमाल जप्त केला.

 

सिद्धार्थनगर, टेका नाका परिसरातील श्री मंगल डेअरीसमोरील प्लॉट क्रमांक २ येथे हुक्का पार्लर सुरू असल्याची माहिती सामाजिक सुरक्षा पथकाला मिळाली होती. मिळालेल्या माहितीच्या आधारे पथकाने रात्रीच्या सुमारास संबंधित ठिकाणी छापा टाकला.

 

कारवाईदरम्यान ग्राहकांना तंबाखूजन्य हुक्का उपलब्ध करून दिला जात असल्याचे पोलिसांच्या निदर्शनास आले. तसेच हुक्का सेवनासाठी सुविधा उपलब्ध करून देण्यात आल्याचेही आढळून आले.

 

या प्रकरणी पोलिसांनी शाहरुख खान, शेख अरमान आणि मोहम्मद समीर अन्सारी या तिघांना ताब्यात घेत अटक केली. घटनास्थळावरून हुक्का पॉट, विविध फ्लेवर आणि इतर साहित्य जप्त करण्यात आले.

 

जप्त मुद्देमाल आणि आरोपींना पुढील कायदेशीर कारवाईसाठी पाचपावली पोलिसांच्या ताब्यात देण्यात आले आहे. या कारवाईमुळे परिसरात सुरू असलेल्या अवैध हुक्का पार्लरवर पोलिसांनी कडक कारवाई केल्याचे स्पष्ट झाले आहे.