आता केस कापणे, दाढी करणे महाग;महाराष्ट्रात सलून सेवांच्या दरात 20 टक्क्यांनी वाढ!
Total Views |
Image Source:(Internet)नागपूर : महाराष्ट्रातील सर्वसामान्य नागरिकांना महागाईचा आणखी एक झटका बसला आहे. राज्यभरातील सलून सेवांच्या दरात 20 टक्क्यांनी वाढ करण्यात आली असून नवीन दर 6 जूनपासून लागू झाले आहेत. त्यामुळे केस कापणे, दाढी करणे, बियर्ड ट्रिमिंग तसेच इतर ग्रूमिंग सेवांसाठी आता ग्राहकांना अधिक पैसे मोजावे लागणार आहेत.
महाराष्ट्र नाभिक महामंडळाने वाढत्या खर्चाचा दाखला देत हा निर्णय घेतला आहे. सलून व्यवसायात वापरल्या जाणाऱ्या हेअर कलर, शेव्हिंग क्रीम, ब्लेड, शॅम्पू, सौंदर्यप्रसाधने, सॅनिटायझेशन साहित्य तसेच वीज खर्चात मोठी वाढ झाल्याने दरवाढ आवश्यक असल्याचे महामंडळाने स्पष्ट केले आहे.
नवीन दरांनुसार सामान्य हेअर कटसाठी सुमारे 150 रुपये, शेव्हिंगसाठी 120 रुपये आणि बियर्ड ट्रिमिंगसाठी 150 रुपये मोजावे लागतील. फेशियल, हेअर स्पा आणि इतर ग्रूमिंग सेवांच्या शुल्कातही वाढ करण्यात आली आहे. मात्र, शहर आणि ग्रामीण भागानुसार तसेच सलूनच्या श्रेणीनुसार दरांमध्ये काही प्रमाणात फरक असू शकतो.
दरवाढीबाबत ग्राहकांमध्ये संमिश्र प्रतिक्रिया उमटत आहेत. वाढत्या महागाईमुळे हा अतिरिक्त आर्थिक भार असल्याचे काहींचे मत आहे, तर वाढलेल्या खर्चामुळे सलून व्यावसायिकांसाठी हा निर्णय आवश्यक असल्याचे अन्य ग्राहकांचे म्हणणे आहे.
सलून चालकांच्या मते, कोरोना काळानंतर व्यवसाय पूर्वपदावर येण्यासाठी मोठा कालावधी लागला. त्यातच भाडे, वीजबिल, साहित्याचा खर्च आणि कर्मचाऱ्यांचे वेतन वाढल्याने जुन्या दरात व्यवसाय चालवणे कठीण झाले होते. त्यामुळे दरवाढीचा निर्णय घेण्यात आला आहे.
यामुळे आता आकर्षक लूक आणि ग्रूमिंगसाठी ग्राहकांना पूर्वीपेक्षा अधिक खर्च करावा लागणार आहे.
