नागपुरात क्राइम ब्रँचचा धडाका; एका दिवसात 13 कारवाया, 15 आरोपींना अटक
Total Views |
Image Source:(Internet)नागपूर : शहरातील वाढत्या गुन्हेगारी आणि अवैध धंद्यांवर लगाम घालण्यासाठी नागपूर क्राइम ब्रँचने शनिवारी मोठी मोहीम राबवत विविध भागांत धाडसत्रे सुरू केली. नुकतेच क्राइम ब्रँचच्या उपायुक्तपदाची सूत्रे स्वीकारलेल्या आयपीएस अधिकारी दीपक अग्रवाल यांच्या मार्गदर्शनाखाली पार पडलेल्या या विशेष कारवाईत एका दिवसात तब्बल 13 कारवाया करण्यात आल्या असून 15 आरोपींना अटक करण्यात आली आहे.
शहरातील गिट्टीखदान, नंदनवन, जरीपटका, सोनेगाव, पाचपावली, भांडेवाडी, सीताबर्डी, कोतवाली आणि सक्करदरा परिसरात एकाचवेळी छापेमारी करून पोलिसांनी अवैध व्यवसायांवर मोठा आघात केला. या कारवाईमुळे गुन्हेगारी विश्वात खळबळ उडाली असून अवैध धंदे करणाऱ्यांमध्ये भीतीचे वातावरण निर्माण झाले आहे.
क्राइम ब्रँचने दारू तस्करीविरोधात कारवाई करत सहा जणांना अटक केली. त्यांच्या ताब्यातून मोठ्या प्रमाणात महुआ दारू, मद्याच्या बाटल्या आणि रोख रक्कम जप्त करण्यात आली. तसेच अनेक अवैध दारू अड्डे उद्ध्वस्त करण्यात आले.
वाहन व मोबाईल चोरीच्या प्रकरणांतही पोलिसांना मोठे यश मिळाले. तीन वेगवेगळ्या गुन्ह्यांचा उलगडा करत एका अल्पवयीनासह पाच आरोपींना अटक करण्यात आली. त्यांच्याकडून चोरीच्या दुचाकी आणि महागडे मोबाईल फोन जप्त करण्यात आले आहेत.
दरम्यान, सीताबर्डी आणि कोतवाली परिसरात धारदार शस्त्रे बाळगणाऱ्या दोन संशयितांना ताब्यात घेण्यात आले. हे आरोपी गंभीर गुन्ह्याच्या तयारीत असल्याचा पोलिसांना संशय आहे. तसेच एका युवकाला गांजाचे सेवन करताना रंगेहात पकडून त्याच्यावर एनडीपीएस कायद्यानुसार कारवाई करण्यात आली.
सक्करदरा परिसरात घरगुती गॅस सिलेंडरचा व्यावसायिक वापर करणाऱ्यांविरोधातही मोठी मोहीम राबविण्यात आली. या कारवाईत मोठ्या प्रमाणात घरगुती व व्यावसायिक सिलेंडर, सिगड्या आणि अन्य साहित्य जप्त करण्यात आले.
याशिवाय मारामारी, दंगल आणि इतर गंभीर गुन्ह्यांमध्ये सहभागी असलेल्या 34 सराईत गुन्हेगारांची पडताळणी करण्यात आली. अनेक संशयितांना पोलिसांनी समज देत त्यांच्या हालचालींवर लक्ष ठेवण्याचा इशारा दिला.
या धडक कारवाईमुळे नागपुरातील गुन्हेगारांना स्पष्ट संदेश मिळाला असून, गुन्हेगारी आणि अवैध धंद्यांविरोधात ‘झिरो टॉलरन्स’ धोरण कायम ठेवत अशा विशेष मोहिमा यापुढेही सुरू राहणार असल्याचे पोलिस सूत्रांनी सांगितले आहे.
