ठाकरे गटाला मोठा धक्का; 20 नगरसेवकांसह अनेक कार्यकर्त्यांचा शिंदे यांच्या शिवसेनेत प्रवेश
Total Views |
Image Source:(Internet)मुंबई : राज्यातील राजकीय घडामोडींना पुन्हा वेग आला असून, उद्धव ठाकरे यांच्या शिवसेनेला मोठा धक्का बसला आहे. रागड जिल्ह्यातील कर्जत नगरपरिषदेमधील 20 नगरसेवकांसह अनेक पदाधिकारी आणि कार्यकर्त्यांनी मुख्यमंत्री एकनाथ शिंदे यांच्या उपस्थितीत शिवसेनेत प्रवेश केला. या पक्षप्रवेशामुळे ठाकरे गटाच्या गोटात खळबळ उडाली आहे.
वरळी गावातील ठाकरे गटाचे माजी शाखाप्रमुख सूर्यकांत कोळी यांनीही आपल्या समर्थकांसह शिंदे यांच्या नेतृत्वावर विश्वास व्यक्त करत शिवसेनेत प्रवेश केला. दीर्घकाळ पक्षासाठी काम करूनही स्थानिक प्रश्नांना प्राधान्य मिळाले नसल्याने हा निर्णय घेतल्याचे त्यांनी यावेळी सांगितले.
पक्षप्रवेश सोहळ्यात बोलताना मुख्यमंत्री एकनाथ शिंदे यांनी नव्याने पक्षात दाखल झालेल्या सर्वांचे स्वागत केले. राज्यभरातून अनेक कार्यकर्ते आणि पदाधिकारी शिवसेनेशी जोडले जात असल्याचे सांगत, पक्षावर विश्वास ठेवणाऱ्या प्रत्येकाला न्याय देण्याचा प्रयत्न केला जाईल, असे त्यांनी नमूद केले.
यावेळी शिंदे यांनी केंद्र सरकारच्या कामगिरीचेही कौतुक केले. देशात विकासाची गती वाढली असून, सामान्य नागरिकांच्या हितासाठी विविध स्तरांवर काम सुरू असल्याचे त्यांनी सांगितले. शिवसेना एनडीएचा महत्त्वाचा घटक पक्ष म्हणून विकासाच्या राजकारणाला प्राधान्य देत असल्याचेही त्यांनी स्पष्ट केले.
दरम्यान, गेल्या काही महिन्यांपासून राज्यात पक्षांतराच्या घटना वाढल्या असून, विविध पक्षांतील नेते आणि कार्यकर्ते नवीन राजकीय पर्याय स्वीकारताना दिसत आहेत. कर्जतमधील 20 नगरसेवकांचा आणि वरळीतील पदाधिकाऱ्यांचा शिंदे यांच्या शिवसेनेत झालेला प्रवेश हा ठाकरे गटासाठी मोठा राजकीय धक्का मानला जात आहे.
