IAS बदल्यांचा धडाका: केंद्र सरकारकडून २१ वरिष्ठ अधिकाऱ्यांच्या नव्या नियुक्त्या जाहीर

Image Source:(Internet)

नवी दिल्ली : केंद्र सरकारने प्रशासकीय यंत्रणेत मोठा फेरबदल करत तब्बल २१ वरिष्ठ अधिकाऱ्यांच्या बदल्या आणि नवीन नियुक्त्या जाहीर केल्या आहेत. सहसचिव तसेच महासचिव स्तरावरील अधिकाऱ्यांचा या व्यापक फेरबदलात समावेश असून कॅबिनेट नियुक्ती समितीने या निर्णयाला अधिकृत मंजुरी दिली आहे. संरक्षण, गृह, ग्रामीण विकास, आरोग्य, सहकार, पंचायत राज, न्याय तसेच इतर महत्त्वाच्या मंत्रालयांमध्ये या अधिकाऱ्यांची नियुक्ती करण्यात आली आहे.

या निर्णयामुळे केंद्रातील विविध मंत्रालयांमध्ये प्रशासकीय कामकाजाला नवी दिशा मिळणार असून अनुभवी IAS, IFoS, IRAS आणि इतर सेवांतील अधिकाऱ्यांना महत्त्वाच्या जबाबदाऱ्या सोपवण्यात आल्या आहेत.

या फेरबदलात दीपा चावला (IRAS 1998) यांची मंत्रिमंडळ सचिवालयातील सुरक्षा विभागात सहसचिव म्हणून नियुक्ती करण्यात आली आहे. गोपाल सिंह (IFoS 2003) यांना कोळसा मंत्रालयात सहसचिव पदाची जबाबदारी देण्यात आली असून अमित कुमार (IAS 2010) यांची वाणिज्य विभागात सहसचिव म्हणून नियुक्ती झाली आहे. शिव पाल सिंह (IFoS 1997) यांना सहकार मंत्रालयात महत्त्वाची जबाबदारी देण्यात आली आहे.

तसेच विजय नामदेवराव झाडे (IAS 2002) आणि डी. सेंथिल पांडियन (IAS 2002) यांना अनुक्रमे संरक्षण उत्पादन आणि पेयजल व स्वच्छता विभागात सहसचिव पदावर नेमण्यात आले आहे. एम. रामचंद्रुडु यांची गृह मंत्रालयात तर अजय कुमार नेमा यांची न्याय विभागात सहसचिव म्हणून नियुक्ती करण्यात आली आहे.

ग्रामीण विकास, पंचायत राज आणि सामाजिक न्याय या विभागांमध्येही मोठ्या प्रमाणावर बदल झाले असून अनेक अनुभवी अधिकाऱ्यांना नवीन जबाबदाऱ्या देण्यात आल्या आहेत. यामुळे केंद्र सरकारच्या प्रशासनात समन्वय वाढवून कामकाज अधिक गतिमान करण्याचा उद्देश असल्याचे मानले जात आहे.