"पक्षनिधी द्या, अन्यथा पद सोडा"; राष्ट्रवादीतील बैठकीतील कथित सूचनांमुळे खळबळ

Image Source:(Internet)

मुंबई : राष्ट्रवादी काँग्रेस (अजित पवार गट) पक्षात पक्षनिधीच्या मुद्द्यावरून मोठी चर्चा सुरू झाली आहे. पक्षाच्या संघटनात्मक कामकाजासाठी आणि विस्तारासाठी मंत्री व आमदारांनी आर्थिक योगदान द्यावे, अशा सूचना खासदार पार्थ पवार यांनी दिल्याची माहिती सूत्रांकडून समोर आली आहे.

सूत्रांच्या म्हणण्यानुसार, मंत्र्यांना ठरावीक रक्कम पक्षनिधी म्हणून जमा करण्यास सांगण्यात आले आहे. तसेच, आमदारांनी विकासकामांसाठी उपलब्ध झालेल्या निधीमधून निश्चित हिस्सा पक्षाकडे वर्ग करावा, असेही निर्देश देण्यात आल्याची चर्चा आहे. पक्षाच्या भविष्यातील उपक्रमांसाठी आणि संघटन बळकट करण्यासाठी निधीची गरज असल्याचे बैठकीत नमूद करण्यात आल्याचे सांगितले जाते.

याचवेळी, पक्षाने दिलेल्या निर्देशांचे पालन न करणाऱ्यांवर कठोर भूमिका घेतली जाऊ शकते, असा इशाराही देण्यात आल्याची माहिती सूत्रांनी दिली आहे. काही वृत्तांनुसार, निर्देश न मानणाऱ्यांना मंत्रिपदाचा राजीनामा द्यावा लागू शकतो, असेही बैठकीत सांगण्यात आल्याची चर्चा आहे. मात्र, याबाबत पक्षाकडून अद्याप कोणतेही अधिकृत स्पष्टीकरण देण्यात आलेले नाही.

दरम्यान, राष्ट्रवादी काँग्रेसमधील अंतर्गत घडामोडी अलीकडच्या काळात सातत्याने चर्चेत आहेत. नुकत्याच झालेल्या एका बैठकीत प्रदेशाध्यक्ष सुनील तटकरे यांनी पक्षावर होत असलेल्या टीकेबाबत नाराजी व्यक्त केल्याचे वृत्त आले होते. त्यावेळी छगन भुजबळ आणि तटकरे यांच्यात शाब्दिक वाद झाल्याच्या चर्चाही रंगल्या होत्या. मात्र, भुजबळ यांनी हे वृत्त फेटाळून लावत कोणताही वाद झाला नसल्याचे स्पष्ट केले होते.

त्यानंतर पार्थ पवार आणि छगन भुजबळ यांच्यातही काही प्रशासकीय मुद्द्यांवरून मतभेद झाल्याच्या चर्चा सुरू झाल्या. तथापि, पार्थ पवार यांनी माध्यमांशी बोलताना हे सर्व दावे निराधार असल्याचे सांगत संबंधित वृत्तांचे खंडन केले आहे.
राष्ट्रवादी काँग्रेसमधील या कथित घडामोडींमुळे राज्याच्या राजकीय वर्तुळात चर्चांना उधाण आले असून, पक्षातील अंतर्गत समीकरणांबाबत विविध तर्क-वितर्कांना वाव मिळत आहे.