तब्बल १८ वर्षांनंतर राज ठाकरे यांना दिलासा; रेल्वे भरती आंदोलनप्रकरणी ठाणे न्यायालयाचा मोठा निर्णय

Image Source:(Internet)

मुंबई : 2008 मध्ये रेल्वे भरती परीक्षेदरम्यान झालेल्या आंदोलन आणि मारहाण प्रकरणात मनसे अध्यक्ष Raj Thackeray यांची ठाणे सत्र न्यायालयाने निर्दोष मुक्तता केली आहे. तब्बल 18 वर्षांपासून सुरू असलेल्या या प्रकरणात न्यायालयाने सरकारी पक्षाचे पुरावे अपुरे असल्याचे नमूद करत हा निकाल दिला.

रेल्वे भरती परीक्षेसाठी 2008 मध्ये कल्याण येथे उत्तर भारतासह विविध राज्यांमधून मोठ्या प्रमाणावर उमेदवार आले होते. त्यावेळी काही उत्तर भारतीय उमेदवारांवर हल्ला आणि मारहाणीच्या घटना घडल्याने राज्यभर खळबळ उडाली होती. या प्रकरणात राज ठाकरे यांच्यासह एकूण 54 जणांविरोधात गुन्हे दाखल करण्यात आले होते.

मात्र, सुनावणीदरम्यान आरोपींचा थेट सहभाग सिद्ध करणारे ठोस पुरावे सादर करण्यात सरकारी पक्षाला अपयश आल्याचे न्यायालयाने स्पष्ट केले. तसेच साक्षीदारांच्या जबाबांमध्येही विसंगती आढळल्याने न्यायालयाने सर्व आरोपींना दिलासा दिला.

या निकालानंतर मनसे कार्यकर्त्यांमध्ये आनंदाचे वातावरण असून, अनेक ठिकाणी जल्लोष करण्यात आला. दुसरीकडे, या निर्णयामुळे राज्यातील राजकीय चर्चांना पुन्हा उधाण आले आहे.