केंद्रीय मंत्री गडकरींच्या हस्ते नागपूर-गोवा विशेष रेल्वेला हिरवा कंदील; प्रवाशांना दिलासा

Image Source:(Internet)

नागपूर : गोव्याला जाणाऱ्या प्रवाशांसाठी आनंदाची बातमी समोर आली असून नागपूर ते मडगाव दरम्यान सुरू करण्यात आलेल्या विशेष रेल्वे सेवेला केंद्रीय मंत्री नितीन गडकरी यांच्या हस्ते हिरवा झेंडा दाखवण्यात आला. नागपूर रेल्वे स्थानकाच्या प्लॅटफॉर्म क्रमांक ८ वर आयोजित कार्यक्रमात ही विशेष ट्रेन रवाना करण्यात आली.

या नव्या रेल्वे सेवेच्या प्रारंभामुळे प्रवाशांमध्ये उत्साहाचे वातावरण पाहायला मिळाले. रेल्वे प्रशासनाचे अधिकारी, जनप्रतिनिधी तसेच नागरिक मोठ्या संख्येने उपस्थित होते. ट्रेन सुटताच प्रवाशांनी आनंद व्यक्त करत जल्लोष केला.

यावेळी बोलताना नितीन गडकरी यांनी सांगितले की, नागपूर आणि गोवा दरम्यान प्रवास करणाऱ्या नागरिकांसाठी ही सेवा अत्यंत उपयुक्त ठरणार आहे. पर्यटन, व्यवसाय तसेच वैयक्तिक कामांसाठी प्रवास करणाऱ्या प्रवाशांना याचा मोठा फायदा होईल, असे त्यांनी स्पष्ट केले.

रेल्वे विभागाच्या माहितीनुसार, नागपूर-मडगाव विशेष ट्रेन आठवड्यातून दोन वेळा धावणार आहे. त्यामुळे विदर्भातून थेट गोव्याला जाणाऱ्या प्रवाशांसाठी आता अधिक सोयीस्कर आणि आरामदायी प्रवासाचा पर्याय उपलब्ध झाला आहे.