पाकिस्तान हादरला! खैबर पख्तूनख्वात भीषण बॉम्बस्फोट; ९ ठार, अनेकांची प्रकृती चिंताजनक

Image Source:(Internet)

लाहोर: पाकिस्तानातील खैबर पख्तूनख्वा प्रांत पुन्हा एकदा रक्तरंजित स्फोटाने हादरला आहे. मंगळवारी (१२ मे २०२६) लक्की मारवत जिल्ह्यातील गजबजलेल्या बाजारपेठेत झालेल्या भीषण बॉम्बस्फोटात किमान ९ जणांचा मृत्यू झाला असून २३ हून अधिक नागरिक जखमी झाले आहेत. मृतांमध्ये दोन वाहतूक पोलिस कर्मचाऱ्यांचाही समावेश असल्याची माहिती समोर आली आहे. अनेक जखमींची प्रकृती गंभीर असल्याने मृतांचा आकडा वाढण्याची भीती व्यक्त केली जात आहे.

स्थानिक माध्यमांच्या माहितीनुसार, बाजारात मोठी गर्दी असताना स्फोटकांनी भरलेल्या लोडर रिक्षामध्ये अचानक स्फोट झाला. स्फोट इतका शक्तिशाली होता की परिसरातील अनेक दुकाने आणि वाहनांचे मोठे नुकसान झाले. घटनेनंतर बाजारपेठेत एकच गोंधळ उडाला आणि नागरिकांनी जीव वाचवण्यासाठी धावाधाव केली.

घटनेची माहिती मिळताच बचाव पथक, पोलिस आणि सुरक्षा यंत्रणा तातडीने घटनास्थळी दाखल झाल्या. जखमींना त्वरित नौरंग रुग्णालयात दाखल करण्यात आले असून काहींवर अतिदक्षता विभागात उपचार सुरू आहेत. स्थानिक नागरिकांनीही मदतकार्यात सहभागी होत जखमींसाठी रक्तदान केल्याची माहिती समोर आली आहे.

स्फोटानंतर संपूर्ण परिसराला सुरक्षा दलांनी वेढा घातला असून बॉम्बशोधक पथकाकडून तपास सुरू करण्यात आला आहे. घटनास्थळावरून महत्त्वाचे पुरावे गोळा करण्यात येत आहेत. प्राथमिक तपासात दहशतवादी संघटनांचा सहभाग असल्याचा संशय व्यक्त करण्यात येत आहे.

दरम्यान, गेल्या काही दिवसांत खैबर पख्तूनख्वा भागात वाढलेल्या दहशतवादी कारवायांमुळे पाकिस्तान सरकारवरील दबाव वाढला आहे. यापूर्वी बन्नू जिल्ह्यातील पोलिस चौकीवर झालेल्या कार बॉम्बहल्ल्यात अनेक पोलिस कर्मचाऱ्यांचा मृत्यू झाला होता. त्या पार्श्वभूमीवर पाकिस्तानने अफगाणिस्तानातील दहशतवादी गटांविरोधात कठोर भूमिका घेतली आहे.

पाकिस्तानच्या परराष्ट्र विभागाने अफगाण अधिकाऱ्यांना समन्स बजावत या हल्ल्यांबाबत तीव्र निषेध नोंदवला आहे. तपास यंत्रणांच्या प्राथमिक माहितीनुसार, काही दहशतवादी संघटनांचे धागेदोरे अफगाणिस्तानशी संबंधित असल्याचा संशय व्यक्त करण्यात येत आहे.

सतत घडणाऱ्या अशा हिंसक घटनांमुळे पाकिस्तानसमोरील अंतर्गत सुरक्षेचे संकट अधिक गंभीर होत असल्याचे तज्ज्ञांचे मत आहे.