नाशिकमध्ये आयटी क्षेत्रातील धक्कादायक प्रकार; तरुणींना जाळ्यात ओढून अत्याचार, सहा आरोपी ताब्यात

 

 Image Source:(Internet)

शहरात महिलांविरुद्धच्या गुन्ह्यांमध्ये सातत्याने वाढ होत असल्याचे चित्र असताना, आयटी क्षेत्राशी (IT sector) संबंधित आणखी एक गंभीर प्रकरण समोर आले आहे. एका प्रतिष्ठित कंपनीतील तरुणींना लक्ष्य करून त्यांच्यावर नियोजनबद्ध पद्धतीने लैंगिक शोषण केल्याचा आरोप उघड झाला आहे.

 

या प्रकरणात मुंबई नाका पोलीस ठाणे येथे नऊ गुन्ह्यांची नोंद करण्यात आली असून पोलिसांनी सहा जणांना अटक केली आहे. अटक आरोपींना न्यायालयाने १० एप्रिलपर्यंत पोलीस कोठडी सुनावली आहे.

 

तपासात समोर आलेल्या माहितीनुसार, आरोपी नव्याने नोकरी शोधणाऱ्या किंवा नुकत्याच कंपनीत रुजू झालेल्या तरुणींना हेरत होते. त्यांच्याशी जवळीक वाढवून “नोकरी मिळवून दिली” असा विश्वास निर्माण केला जात होता आणि त्यातून मानसिक दबाव टाकला जात होता.

 

यानंतर पार्टी, सहली यांसारखी आमिषे दाखवून तरुणींना एकांतस्थळी नेण्यात येत असे. तिथे त्यांच्यावर अत्याचार केल्याचे आरोप आहेत. काही प्रकरणांमध्ये विनयभंग आणि बलात्कारासारखे गंभीर गुन्हे घडल्याचेही उघड झाले आहे.

 

अत्याचारानंतर पीडितांचे फोटो व व्हिडिओ काढून त्यांना धमकावले जात होते. या माध्यमातून वारंवार अत्याचार केला जात होता. काही प्रकरणांत इतर साथीदारांनाही सामील करून साखळी पद्धतीने शोषण करण्यात आल्याचे समोर आले आहे.

 

पीडितांकडून काही अतिरिक्त तक्रारीही करण्यात आल्या असून त्याचीही चौकशी सुरू आहे. या प्रकरणात आणखी कोणाचा सहभाग आहे का, याचा शोध पोलीस घेत आहेत.

 

या घटनेमुळे नाशिकमध्ये संतापाचे वातावरण असून महिलांच्या सुरक्षिततेबाबत पुन्हा प्रश्नचिन्ह निर्माण झाले आहे.