विदर्भात उन्हाचा तडाखा; तापमान ४० अंशांच्या दिशेने

 

 Image Source:(Internet)

उन्हाळा अधिकृतपणे सुरू होण्यापूर्वीच विदर्भात उष्णतेची तीव्र लाट जाणवू लागली आहे. फेब्रुवारीच्या अखेरीस थंडीचा प्रभाव कमी झाला आणि मार्चच्या प्रारंभीच तापमानात (Temperature) लक्षणीय वाढ झाली. नागपुरात कमाल तापमान ३६.४ अंश सेल्सिअस नोंदवले गेले असून दुपारच्या सुमारास कडक उन्हामुळे रस्त्यांवरची वर्दळ कमी झाल्याचे चित्र दिसत आहे.

 

वर्धा आणि अमरावती येथे पारा ३७ अंशांपर्यंत गेला आहे. अकोला व चंद्रपूरमध्ये तापमान ३६ अंशांच्या पुढे गेले, तर भंडारा, गोंदिया, गडचिरोली, यवतमाळ आणि वाशिम जिल्ह्यांत ३४ ते ३५ अंशांच्या दरम्यान नोंदी झाल्या. भंडाऱ्यात एका दिवसात ४.८ अंशांची वाढ झाल्याने उष्णतेचा परिणाम अधिक तीव्र जाणवला.

 

फेब्रुवारीच्या उत्तरार्धात रात्रीचे तापमान १७ ते १९ अंशांदरम्यान होते. दिवसाचे तापमान ३२ ते ३४ अंशांच्या आसपास स्थिर होते. मात्र यंदा होळीपूर्वीच तापमानाने उसळी घेतल्याने हवामानातील बदल स्पष्टपणे जाणवत आहे.

 

भारतीय हवामान विभाग यांनी दिलेल्या अंदाजानुसार, पुढील काही दिवसांत कमाल तापमान ३८ ते ४० अंशांदरम्यान पोहोचू शकते. उष्णतेची तीव्रता वाढण्याची शक्यता लक्षात घेऊन नागरिकांनी आवश्यक ती काळजी घ्यावी, असे आवाहन करण्यात आले आहे.

तापमानातील वाढीमुळे उष्माघात, डिहायड्रेशनसारख्या समस्या उद्भवू शकतात. त्यामुळे पुरेसे पाणी पिणे, उन्हात दीर्घकाळ न राहणे, डोक्यावर आच्छादन ठेवणे आणि हलक्या रंगाचे सैल कपडे वापरणे गरजेचे आहे. लहान मुले, ज्येष्ठ नागरिक आणि मैदानी कामगारांनी विशेष दक्षता बाळगावी.

 

दरम्यान, पुण्यात किमान तापमानात घट झाल्याने सकाळी गारवा जाणवत असला तरी दुपारी निरभ्र आकाशामुळे उकाडा कायम आहे. पुढील दोन-तीन दिवसांत तापमानात मोठा बदल अपेक्षित नसल्याचे हवामान विभागाने स्पष्ट केले आहे.

 

विदर्भात उन्हाळ्याची सुरुवातच कडक झाल्याने एप्रिल-मे महिन्यात तापमान आणखी वाढण्याची शक्यता व्यक्त केली जात आहे.