येत्या तीन महिन्यांत गॅस टंचाईचा इशारा?भुजबळांच्या विधानामुळे नागरिकांमध्ये चिंता वाढली

 

 Image Source:(Internet)

राज्यात तसेच देशभरात घरगुती गॅस (Gas) पुरवठ्याबाबत अनिश्चिततेचे वातावरण निर्माण झाले आहे. आखाती भागात वाढलेल्या तणावाचा परिणाम आता इंधन क्षेत्रावर जाणवू लागला असून, एलपीजी उपलब्धतेवर त्याचे सावट पडण्याची शक्यता व्यक्त केली जात आहे.

 

याच पार्श्वभूमीवर राज्याचे अन्न व नागरी पुरवठा मंत्री छगन भुजबळ यांनी केलेल्या विधानामुळे सर्वसामान्यांच्या चिंतेत भर पडली आहे. पुढील काही महिन्यांत गॅस पुरवठ्यात अडथळे येऊ शकतात, असा इशारा केंद्र सरकारच्या सूचनेतून मिळाल्याचे त्यांनी सांगितले.

 

दिल्ली येथे झालेल्या उच्चस्तरीय बैठकीनंतर माध्यमांशी संवाद साधताना भुजबळ यांनी ही माहिती दिली. या बैठकीत आंतरराष्ट्रीय बाजारातील परिस्थिती, वाढलेले दर, तसेच युद्धसदृश परिस्थितीमुळे विस्कळीत झालेली पुरवठा साखळी यांचा सविस्तर आढावा घेण्यात आला. भारत मोठ्या प्रमाणात एलपीजीसाठी परदेशांवर अवलंबून असल्याने, विशेषतः आखाती देशांमधील घडामोडींचा थेट परिणाम देशांतर्गत उपलब्धतेवर होऊ शकतो.

 

या संभाव्य अडचणींवर तोडगा म्हणून पाइपद्वारे पुरवठा होणाऱ्या नैसर्गिक वायूचा वापर वाढवण्यावर सरकार भर देत आहे. शहरांमध्ये या सुविधेचा विस्तार करण्यासाठी स्थानिक प्रशासनाने पुढाकार घ्यावा, तसेच नव्या इमारतींमध्ये ही जोडणी अनिवार्य करण्याचा विचार सुरू असल्याचेही त्यांनी स्पष्ट केले.

 

तसेच, या सेवेसाठी लागणाऱ्या परवानग्या जलद मिळाव्यात यासाठी प्रक्रिया सुलभ करण्यात येत असून, कमी वेळेत मंजुरी देण्याचे धोरण राबवले जात आहे.

 

घरगुती वापरासाठी गॅसवर अवलंबून असलेल्या नागरिकांसाठी ही बाब अत्यंत महत्त्वाची ठरणार आहे. त्यामुळे येत्या काळात पर्यायी साधनांचा विचार, गॅसचा संयमाने वापर आणि आवश्यक ती तयारी ठेवणे गरजेचे ठरणार आहे.