महाराष्ट्रातील टपाल कार्यालयसह पासपोर्ट केंद्रांना बॉम्बची धमकी; राज्यभर हायअलर्ट!

Image Source:(Internet)

नागपूर : राज्यात पुन्हा एकदा सुरक्षा व्यवस्थेची कसोटी लागली असून बीडसह महाराष्ट्रातील प्रमुख टपाल कार्यालये आणि पासपोर्ट सेवा केंद्रांना बॉम्बने उडवण्याची धमकी मिळाल्याने मोठी खळबळ उडाली आहे. बुधवारी दुपारी आलेल्या एका निनावी ई-मेलमुळे प्रशासन तात्काळ सतर्क झाले असून संपूर्ण राज्यात हायअलर्ट जारी करण्यात आला आहे.

धमकीचा ई-मेल नेमका काय म्हणतो?
मिळालेल्या माहितीनुसार, अज्ञात व्यक्तीकडून पाठवण्यात आलेल्या ई-मेलमध्ये आरडीएक्स आणि सायनाइडसारख्या घातक पदार्थांचा वापर करून राज्यातील तब्बल 16 ठिकाणी भीषण स्फोट घडवून आणण्याची धमकी देण्यात आली आहे. दुपारी 12 वाजून 10 मिनिटांचा वेळही या धमकीत नमूद करण्यात आला होता, ज्यामुळे यंत्रणांची धावपळ उडाली.

या ई-मेलमध्ये स्वतःला “कोयंबटूरचे मुसलमान” असे संबोधणाऱ्या गटाने तामिळनाडूतील काही राजकीय घडामोडी, केंद्र सरकारकडून यूएपीए अंतर्गत झालेली कारवाई आणि माध्यमांविषयी नाराजी व्यक्त करत ही धमकी दिल्याचा दावा केला आहे. तसेच, नक्षलवादी आणि आयएसआय सेलची मदत घेतल्याचा उल्लेखही या संदेशात करण्यात आला आहे.

बीडमध्ये तातडीची कारवाई-
धमकीनंतर बीडमधील मुख्य टपाल कार्यालयात तात्काळ खबरदारीचे उपाय करण्यात आले. दुपारच्या सुमारास कार्यालयातील सर्व कर्मचारी व नागरिकांना बाहेर काढण्यात आले. काही काळ कामकाज बंद ठेवून परिसराची सखोल तपासणी करण्यात आली. अधिकाऱ्यांनी निनावी ई-मेल प्राप्त झाल्याची पुष्टी केली आहे.

राज्यभर सुरक्षा कडक-
मुंबई, पुणे, नाशिक, धुळे आणि छत्रपती संभाजीनगरसह प्रमुख शहरांमध्ये पोलीस आणि बॉम्ब शोधक व नाशक पथक (BDDS) सतर्क झाले असून सर्व संवेदनशील ठिकाणांची तपासणी सुरू आहे. पासपोर्ट सेवा केंद्रांभोवती विशेष बंदोबस्त तैनात करण्यात आला आहे.

सायबर तपास सुरू-
दरम्यान, हा धमकीचा ई-मेल नेमका कुठून पाठवण्यात आला, याचा तपास सायबर सेलमार्फत सुरू आहे. संबंधित आयपी ॲड्रेस आणि पाठवणाऱ्याचा माग काढण्यासाठी यंत्रणा युद्धपातळीवर काम करत आहेत.

नागरिकांनी अफवांपासून दूर राहावे-
प्रशासनाने नागरिकांना आवाहन केले आहे की, कोणत्याही अफवांवर विश्वास ठेवू नये आणि संशयास्पद वस्तू किंवा हालचाली आढळल्यास तात्काळ पोलिसांना कळवावे.

दरम्यान, या संपूर्ण प्रकरणामुळे राज्यातील सुरक्षा यंत्रणा सज्ज झाल्या असून, परिस्थितीवर बारकाईने लक्ष ठेवण्यात येत आहे.