दिल्लीत खळबळ! विधानसभेला बॉम्बस्फोटाची धमकी; उच्चस्तरीय सतर्कता, तपास सुरू

Image Source:(Internet)

नवी दिल्ली : राजधानी दिल्लीत मंगळवारी सकाळी मोठी खळबळ उडाली, जेव्हा विधानसभा इमारत उडवून देण्याची धमकी देणारा ईमेल समोर आला. हा ईमेल विधानसभा अध्यक्ष विजेंद्र गुप्ता यांच्या अधिकृत मेलवर पाठवण्यात आला असल्याची माहिती समोर आली आहे.

या धमकीत दिल्ली विधानसभा इमारतीसोबतच ‘विधानसभा’ मेट्रो स्थानकावरही हल्ला करण्याचा इशारा देण्यात आला होता. विशेष म्हणजे, नायब राज्यपाल तरनजीत सिंग संधू यांनाही अशाच प्रकारचा धमकीचा मेल प्राप्त झाल्याचे समजते.

याचबरोबर मुख्यमंत्री रेखा गुप्ता, मंत्री मनजिंदर सिंग सिरसा तसेच पंतप्रधान नरेंद्र मोदी, गृहमंत्री अमित शाह आणि परराष्ट्र मंत्री डॉ. एस. जयशंकर यांनाही धमकीचे संदेश पाठवण्यात आल्याची माहिती पुढे आली आहे.

घटनेची माहिती मिळताच दिल्ली पोलिसांसह सर्व सुरक्षा यंत्रणा तात्काळ अलर्टवर ठेवण्यात आल्या. पोलिसांनी विधानसभा परिसर आणि मेट्रो स्थानकावर कसून तपासणी केली. श्वान पथक आणि बॉम्ब निकामी पथकानेही घटनास्थळी शोधमोहीम राबवली. मात्र, आतापर्यंत कोणतीही संशयास्पद वस्तू आढळून आलेली नाही.

मिळालेल्या माहितीनुसार, सकाळी ७:२८ वाजता विधानसभा ईमेल आयडीवर तर ७:४९ वाजता अध्यक्षांच्या ईमेलवर धमकीचा मेल आला होता.

दरम्यान, या घटनेवर प्रतिक्रिया देताना भाजप आमदार हरीश खुराना यांनी सांगितले की, “अशा धमक्यांना आम्ही घाबरणार नाही. विकासाच्या मार्गावर आमचे सरकार ठाम आहे.” तर आमदार अनिल गोयल यांनी ही घटना अफवा असल्याचे सांगत सर्व काही सुरक्षित असल्याचा दावा केला.

सध्या या प्रकरणाचा सखोल तपास सुरू असून, धमकी देणाऱ्या व्यक्तीचा शोध घेण्यासाठी यंत्रणा सक्रिय झाल्या आहेत.