बिहार बोर्ड १२वीचा निकाल जाहीर; ८५.१९ टक्के विद्यार्थी उत्तीर्ण, मुलींचा दबदबा कायम

Image Source:(Internet)

पटना : बिहार विद्यालय परीक्षा समितीने (BSEB) सोमवारी बारावी (इंटरमीडिएट) परीक्षेचा २०२६ चा निकाल जाहीर केला. यंदा एकूण ८५.१९ टक्के विद्यार्थी उत्तीर्ण झाले असून, मागील वर्षांच्या तुलनेत हा निकाल अधिक चांगला मानला जात आहे. राज्याचे शिक्षण मंत्री सुनील कुमार यांनी यशस्वी विद्यार्थ्यांचे अभिनंदन करत शिक्षण क्षेत्रातील सुधारणांचा हा सकारात्मक परिणाम असल्याचे सांगितले.

बिहार बोर्डने यंदाही विक्रमी वेगाने निकाल जाहीर करत आपली परंपरा कायम ठेवली आहे. अवघ्या २५ दिवसांत उत्तरपत्रिकांचे मूल्यमापन पूर्ण करण्यात आले, ही देशातील इतर शिक्षण मंडळांच्या तुलनेत जलद प्रक्रिया मानली जाते.

यंदाच्या निकालातही मुलींनी आघाडी घेतली असून त्यांच्या उत्तीर्णतेचे प्रमाण मुलांच्या तुलनेत अधिक आहे. एकूण १३.१७ लाख विद्यार्थ्यांनी परीक्षा दिली होती, त्यात मुलींची संख्या थोडी अधिक होती. गुणवंतांच्या यादीतही मुलींचा दबदबा दिसून आला आहे.

विज्ञान शाखेत समस्तीपूरचा आदित्य प्रकाश अमन, कला शाखेत गया येथील निशु कुमारी आणि वाणिज्य शाखेत पटण्याची अदिती कुमारी यांनी अव्वल स्थान पटकावले आहे. विद्यार्थ्यांनी केलेल्या उत्कृष्ट कामगिरीमुळे राज्याच्या शैक्षणिक प्रगतीचे चित्र अधिक स्पष्ट झाले आहे.

दरम्यान, ज्या विद्यार्थ्यांना आपल्या गुणांबाबत समाधान नाही, त्यांना पुनर्मूल्यांकनासाठी अर्ज करण्याची संधी उपलब्ध करून देण्यात आली आहे. परीक्षा आणि मूल्यमापन प्रक्रिया पारदर्शक पद्धतीने राबवण्यात आल्याचेही शिक्षण विभागाकडून सांगण्यात आले आहे.