नागपूरच्या कामठीत १७ वर्षीय तरुणाची रक्तरंजित हत्या; तीन अल्पवयीन संशयित ताब्यात

 

 Image Source:(Internet)

शहरालगतच्या कामठी (Kamathi) परिसरात रविवारी उशिरा रात्री घडलेल्या एका थरारक घटनेने परिसर हादरला आहे. ड्रॅगन पॅलेस टेंपल समोरील भागात १७ वर्षीय तरुणावर धारदार हत्यारांनी हल्ला करून त्याची निर्घृण हत्या करण्यात आली. या प्रकरणात कामठी पोलिस स्टेशन यांनी कायद्याच्या संघर्षातील तीन अल्पवयीन मुलांना ताब्यात घेतले असून सखोल तपास सुरू आहे.

 

मृत तरुणाचे नाव अरमान अली (१७) असे असून तो कामठी कॅन्टोन्मेंटमधील कमसरी बाजार परिसरात राहत होता. रविवारी (१ मार्च २०२६) रात्री साडेनऊच्या सुमारास त्याला ओळखीच्या व्यक्तीकडून फोन आला होता. काही बोलायचे असल्याचे सांगत त्याला ड्रॅगन पॅलेस मंदिरासमोर, हल्दीराम रेस्टॉरंटजवळ बोलावण्यात आले. अरमान आपल्या मित्र मोहित दहत (१७) याच्यासोबत त्या ठिकाणी पोहोचला.

 

प्राथमिक चौकशीत असे समोर आले आहे की, संशयितांनी आधीच कट रचून अरमानला सापळ्यात ओढले. ठरल्याप्रमाणे भेट होताच आरोपींनी त्याच्यावर अचानक हल्ला चढवला. धारदार शस्त्रांनी वार करत त्याला गंभीर जखमी केले. या हल्ल्यात अरमानचा घटनास्थळीच मृत्यू झाला, तर त्याचा मित्र मोहित गंभीर जखमी झाला.

 

जखमी मोहितला तातडीने स्थानिक उपजिल्हा रुग्णालयात हलविण्यात आले. त्यानंतर अधिक उपचारांसाठी त्याला मेयो रुग्णालय येथे दाखल करण्यात आले आहे. डॉक्टरांच्या माहितीनुसार त्याची प्रकृती चिंताजनक आहे.

 

दरम्यान, अरमानचे वडील शौकत अब्बास अली (४५) यांच्या तक्रारीवरून पोलिसांनी भारतीय न्याय संहितेअंतर्गत खून आणि गुन्हेगारी कटाच्या कलमांनुसार गुन्हा नोंदवला आहे. ताब्यात घेतलेल्या तिन्ही अल्पवयीन संशयितांची चौकशी सुरू असून हत्येमागील कारण अद्याप अस्पष्ट आहे. जुना वाद, वैयक्तिक भांडण की अन्य काही कारण, याचा शोध घेण्यासाठी पोलिसांनी तपासाची सूत्रे वेगाने हलवली आहेत.

 

या घटनेनंतर कामठी परिसरात भीतीचे सावट पसरले असून नागरिकांमध्ये संतापाची लाट उसळली आहे. कायद्याचा धाक कमी होत असल्याची चर्चा रंगू लागली असून, अल्पवयीनांकडून घडलेल्या या गंभीर गुन्ह्यामुळे सामाजिक प्रश्नही ऐरणीवर आले आहेत.