एआयची कमाल...संगणकीय तंत्रज्ञानाच्या मदतीने कर्करोगावर लस; कुत्र्याला मिळाले नवे जीवन!

Image Source:(Internet)

ऑस्ट्रेलिया : कृत्रिम बुद्धिमत्ता तंत्रज्ञानामुळे वैद्यकीय क्षेत्रात नवे प्रयोग घडत असल्याचे एक वेगळे उदाहरण समोर आले आहे. संगणकीय बुद्धिमत्तेच्या मदतीने एका तंत्रज्ञान तज्ञाने आपल्या पाळीव कुत्र्याच्या कर्करोगावर उपचाराचा मार्ग शोधला आहे. विशेष पद्धतीने तयार करण्यात आलेल्या लसीमुळे त्या कुत्र्याच्या शरीरातील गाठीचा आकार जवळपास निम्म्याने कमी झाल्याचे सांगितले जात आहे.

ऑस्ट्रेलियातील तंत्रज्ञान क्षेत्रातील तज्ञ पॉल कनिंगहॅम यांची पाळीव कुत्री ‘रोझ’ला कर्करोग झाल्याचे निदान झाले होते. पशुवैद्यकांनी तिच्याकडे फार कमी दिवस शिल्लक असल्याचे सांगितल्यानंतर त्यांनी हार न मानता संगणकीय बुद्धिमत्तेच्या साहाय्याने उपाय शोधण्याचा निर्णय घेतला.

यासाठी त्यांनी अत्याधुनिक संगणकीय संवाद प्रणाली तसेच प्रथिनांच्या रचनेचा अभ्यास करणाऱ्या संगणकीय पद्धतींचा उपयोग केला. कुत्र्याच्या गाठीचा नमुना घेऊन त्यातील जनुकांचा क्रम तपासण्यात आला. त्यासाठी त्यांनी ऑस्ट्रेलियातील जनुक संशोधन करणाऱ्या संस्थेशी संपर्क साधला.

जनुकांची माहिती मिळाल्यानंतर विविध संगणकीय पद्धतींच्या मदतीने त्या माहितीचे सखोल विश्लेषण करण्यात आले. यामधून कर्करोगास कारणीभूत ठरणाऱ्या जनुकीय बदलांची ओळख पटली. या माहितीच्या आधारे त्या कुत्र्यासाठी विशेष वैयक्तिकृत दूत-अम्लावर आधारित लसीचा आराखडा तयार करण्यात आला.

गेल्या वर्षी हिवाळ्यातील सणांच्या सुमारास या लसीच्या माध्यमातून उपचार सुरू करण्यात आले. उपचार सुरू झाल्यानंतर काही दिवसांतच कुत्र्याच्या शरीरातील गाठीचा आकार लक्षणीयरीत्या कमी झाल्याचे दिसून आले.

मात्र ही लस तयार करण्याइतकेच तिच्यासाठी अधिकृत परवानगी मिळवणे मोठे आव्हान ठरले. ऑस्ट्रेलियात औषध चाचणीसाठी मान्यता मिळवण्यासाठी जवळपास तीन महिने सातत्याने परिश्रम घ्यावे लागले आणि सुमारे शंभर पानांची कागदपत्रे तयार करावी लागली.

या प्रयोगामुळे तंत्रज्ञान आणि वैद्यकीय क्षेत्रात मोठी चर्चा सुरू झाली आहे. कृत्रिम बुद्धिमत्तेच्या मदतीने भविष्यात कर्करोगासारख्या गंभीर आजारांवर अधिक प्रभावी उपचार शोधण्याचा मार्ग खुला होऊ शकतो, अशी आशा तज्ज्ञांकडून व्यक्त केली जात आहे.