सरकारकडून लाडक्या बहिणींना धक्का; डिजिटल पडताळणीनंतर ९० लाख महिलांची नावे वगळली

Image Source:(Internet)

नागपूर : महाराष्ट्र सरकारच्या मुख्यमंत्री माझी लाडकी बहिण योजनेत मोठी छाननी करण्यात आली असून डिजिटल तपासणीनंतर तब्बल ९० लाख महिलांची नावे लाभार्थी यादीतून वगळण्यात आली आहेत. राज्य सरकारने केलेल्या व्यापक पडताळणीनंतर योजनेतील लाभार्थ्यांची संख्या मोठ्या प्रमाणात कमी झाली आहे.

सुरुवातीला या योजनेसाठी २ कोटी ६० लाखांहून अधिक महिलांनी अर्ज केला होता, मात्र नव्याने झालेल्या तपासणीनंतर ही संख्या आता सुमारे १ कोटी ५३ लाखांवर आली आहे. शासनाने कर नोंदी, वाहन नोंदणी तसेच इतर शासकीय माहिती प्रणालीशी तुलना करून अर्जदारांची पात्रता तपासली.

या प्रक्रियेमुळे अनेक कुटुंबांमध्ये चिंता निर्माण झाली आहे, कारण या योजनेतून मिळणाऱ्या मासिक आर्थिक सहाय्यावर अनेक महिलांचा आधार होता. पडताळणीत काही अर्जदार पात्रतेच्या निकषात बसत नसल्याचे स्पष्ट झाल्याने त्यांची नावे यादीतून वगळण्यात आली.

विशेषतः बीड जिल्ह्यात सर्वाधिक नावे बाद झाल्याची माहिती समोर आली आहे. केवळ या जिल्ह्यातूनच २ लाख ८३ हजार महिलांची नावे तपासणीनंतर काढून टाकण्यात आली. करदाते असणे, वाहन मालकी किंवा इतर निकषांमुळे अनेक अर्ज अपात्र ठरले.

दरम्यान, शासनाकडून ही मोहीम योजनेतील अपात्र लाभार्थ्यांना दूर करण्यासाठी आणि पात्र महिलांपर्यंत मदत पोहोचवण्यासाठी राबविण्यात आल्याचे सांगितले जात आहे. मात्र अचानक झालेल्या या मोठ्या छाटणीमुळे राज्यभरात चर्चा सुरू झाली आहे.