नागपूर जिल्ह्यातील काटोलमध्ये दारुगोळा कारखान्यात भीषण स्फोट; १७ कामगारांचा मृत्यू

 

 Image Source:(Internet)

नागपूर (Nagpur) जिल्ह्यातील काटोल तालुक्यातील राऊळगाव येथे असलेल्या एसबीएल एनर्जी या दारुगोळा निर्मिती करणाऱ्या कंपनीत झालेल्या भीषण स्फोटात तब्बल १७ कामगारांचा मृत्यू झाल्याची हृदयद्रावक घटना घडली आहे. या दुर्घटनेमुळे संपूर्ण जिल्ह्यावर शोककळा पसरली आहे.

 

मिळालेल्या प्राथमिक माहितीनुसार, सकाळच्या सुमारास कारखान्यात अचानक मोठा स्फोट झाला. स्फोट इतका तीव्र होता की परिसरात मोठा आवाज घुमला आणि कारखान्याच्या इमारतीचा काही भाग कोसळला. घटनेनंतर तात्काळ बचावकार्य सुरू करण्यात आले. ढिगाऱ्याखाली अडकलेल्या कामगारांना बाहेर काढण्यासाठी स्थानिक प्रशासन, पोलिस आणि आपत्कालीन यंत्रणा युद्धपातळीवर कार्यरत आहेत.

 

या भीषण दुर्घटनेत १७ कामगारांचा जागीच मृत्यू झाला असून काही जण गंभीर जखमी झाले आहेत. जखमींवर जवळच्या रुग्णालयात उपचार सुरू असून त्यांची प्रकृती चिंताजनक असल्याची माहिती सूत्रांनी दिली.

 

घटनेची माहिती मिळताच जिल्हा प्रशासनातील वरिष्ठ अधिकारी घटनास्थळी दाखल झाले. स्फोटाचे नेमके कारण अद्याप स्पष्ट झाले नसून याबाबत चौकशीचे आदेश देण्यात आले आहेत. सुरक्षाविषयक नियमांचे पालन झाले होते का, याचीही तपासणी केली जाणार आहे.

 

या दुर्दैवी घटनेमुळे मृत कामगारांच्या कुटुंबीयांवर दुःखाचा डोंगर कोसळला आहे. विविध स्तरांतून शोक व्यक्त केला जात असून मृतांना भावपूर्ण श्रद्धांजली अर्पण करण्यात येत आहे. जखमी कामगारांनी लवकर बरे व्हावे, अशी प्रार्थना सर्वत्र व्यक्त होत आहे.