नागपूर मनपात ‘महिला नेतृत्व’ ; सर्व समित्यांच्या अध्यक्षपदी महिलांचीच नियुक्ती होणार
Total Views |
नागपूर :
नागपूर (Nagpur) महानगरपालिका येथे महिलांच्या हाती पूर्ण नेतृत्व देण्याचा महत्त्वाकांक्षी निर्णय पुढे आला आहे. विविध समित्यांच्या निवडणुका जवळ आल्याच्या पार्श्वभूमीवर भारतीय जनता पार्टीने सर्व समित्यांच्या अध्यक्षपदी महिलांची नियुक्ती करण्याचा प्रस्ताव मांडला आहे. हा प्रयोग प्रत्यक्षात उतरल्यास महिलांच्या संपूर्ण नेतृत्वाखाली कार्य करणारी देशातील पहिली महानगरपालिका म्हणून नागपूरची नोंद होऊ शकते.
भाजपचे शहराध्यक्ष दयाशंकर तिवारी यांनी पत्रकारांशी संवाद साधताना सांगितले की, राजकारण आणि प्रशासनात महिलांचा सहभाग वाढवण्यासाठी पक्षाने हा पुढाकार घेतला आहे. पंतप्रधान नरेंद्र मोदी यांनी महिलांना ५० टक्के आरक्षण देण्याबाबत व्यक्त केलेल्या भूमिकेच्या धर्तीवर नागपूर मनपातही महिलांना नेतृत्वाची संधी देण्याचा निर्णय घेण्यात आला आहे.
या निर्णयासाठी मुख्यमंत्री देवेंद्र फडणवीस, केंद्रीय मंत्री नितीन गडकरी तसेच महसूलमंत्री चंद्रशेखर बावनकुळे यांच्यासह वरिष्ठ पदाधिकाऱ्यांशी चर्चा करण्यात आली. सकारात्मक प्रतिसादानंतर कोअर समितीच्या बैठकीत प्रस्तावाला अंतिम स्वरूप देण्यात आल्याची माहिती तिवारी यांनी दिली.
स्थायी समिती, परिवहन समिती आणि इतर दहा विशेष समित्यांच्या अध्यक्षपदांसह महानगरपालिकेच्या दहा झोनच्या सभापतीपदावरही महिलांचीच नियुक्ती करण्याचा विचार आहे. प्रशासनातील धोरणात्मक निर्णय प्रक्रियेत महिलांचा प्रभाव वाढवण्याचा हा प्रयत्न असल्याचे पक्षाकडून स्पष्ट करण्यात आले.
दरम्यान, भारतीय राष्ट्रीय काँग्रेसलाही स्थायी समितीतील चार जागांवर महिलांना संधी देण्याचे आवाहन करण्यात आले आहे. तसेच ऑल इंडिया मजलिस-ए-इत्तेहादुल मुस्लिमीन आणि मुस्लिम लीग यांनीदेखील या उपक्रमात सहभागी होत महिलांना प्राधान्य द्यावे, असे तिवारी यांनी नमूद केले.
महिलांच्या नेतृत्वामुळे प्रशासन अधिक संवेदनशील, पारदर्शक आणि परिणामकारक बनेल, असा विश्वास व्यक्त करण्यात येत असून या निर्णयाच्या अंमलबजावणीकडे राज्यभरातून उत्सुकतेने पाहिले जात आहे.
