दिवाळीच्या खरेदीसाठी दादर मार्केटमध्ये ग्राहकांची गर्दी; मिठाईच्या दुकानांत रेलचेल

Image Source:(Internet)

मुंबई : दिवाळीचा सण जवळ आल्याने मुंबईतील दादर मार्केटमध्ये खरेदीचा उत्साह पाहायला मिळत आहे. दिवाळीच्या तयारीसाठी नागरिकांनी बाजारपेठेत गर्दी केली असून मिठाईच्या दुकानांमध्ये सकाळपासूनच ग्राहकांची मोठी रेलचेल सुरू आहे. सणाच्या पार्श्वभूमीवर मिठाई खरेदीला विशेष पसंती मिळत असतानाच दुसरीकडे भेसळयुक्त मिठाईच्या संशयावरून अन्न व औषध प्रशासनाकडून (FDA) विविध दुकानांवर कारवाई केली जात असल्याने मिठाईच्या गुणवत्तेचा मुद्दाही चर्चेत आला आहे.

दादर मार्केटमधील जुन्या मिठाई विक्रेत्यांनी आपली बाजू मांडताना वर्षानुवर्षे ग्राहकांना दर्जेदार मिठाई पुरवत असल्याचा दावा केला आहे. यंदा मिठाईच्या विक्रीत काहीशी घट जाणवत असली, तरी पारंपरिक मिठाईला ग्राहकांकडून चांगली मागणी असल्याचे व्यापाऱ्यांनी सांगितले. विशेषतः पुरणपोळी, पेढे आणि इतर महाराष्ट्रीयन पारंपरिक मिठाई खरेदी करण्याकडे ग्राहकांचा कल दिसून येत आहे.

दरम्यान, एफडीएकडून मिठाईच्या दुकानांवर केली जाणारी तपासणी आणि कारवाई योग्य असल्याचे मत ग्राहकांनी व्यक्त केले आहे. सणासुदीच्या काळात मोठ्या प्रमाणावर मिठाईची खरेदी-विक्री होते. त्यामुळे नागरिकांच्या आरोग्याच्या दृष्टीने मिठाईची गुणवत्ता आणि अन्नपदार्थांची शुद्धता तपासणे आवश्यक असल्याचे ग्राहकांचे म्हणणे आहे.

एकीकडे एफडीएकडून भेसळ रोखण्यासाठी सुरू असलेली कारवाई, तर दुसरीकडे दिवाळीच्या खरेदीचा उत्साह, अशा दुहेरी वातावरणात दादर मार्केटमध्ये मिठाई खरेदीसाठी नागरिकांची गर्दी कायम आहे.