मुख्यमंत्री योगींकडून ५ लाखांची मदत जाहीर, सपाकडून भाजपला प्रत्युत्तर

Image Source:(Internet)
लखनौ : उत्तर प्रदेशातील गोरखपूर येथे समाजवादी पक्षाचे प्रमुख अखिलेश यादव यांच्या रोड शोदरम्यान घडलेल्या दुर्दैवी घटनेने राजकीय वातावरण तापले आहे. रोड शोच्या वेळी जेसीबीच्या धडकेत एका बालकाचा मृत्यू झाल्याने मोठी खळबळ उडाली आहे. या घटनेनंतर मुख्यमंत्री योगी आदित्यनाथ यांनी अखिलेश यादव यांच्यावर निशाणा साधला, तर समाजवादी पक्षानेही भाजपच्या आरोपांना प्रत्युत्तर दिले आहे. मृत बालकाच्या कुटुंबीयांना मुख्यमंत्री योगी यांनी पाच लाख रुपयांची आर्थिक मदत जाहीर केली आहे.
या घटनेवर प्रतिक्रिया देताना मुख्यमंत्री योगी आदित्यनाथ यांनी समाजवादी पक्षाच्या रोड शोमधील व्यवस्थेवर प्रश्नचिन्ह उपस्थित केले. एका निष्पाप बालकाचा काय दोष होता, असा सवाल करत समाजवादी पक्षाच्या कथित अराजकतेमुळे त्याला जीव गमवावा लागल्याचा आरोप त्यांनी केला. रोड शोदरम्यान कार्यकर्त्यांच्या गर्दीमुळे आणि उत्साहाच्या अतिरेकामुळे सामान्य नागरिकांच्या सुरक्षेकडे दुर्लक्ष झाल्याचेही त्यांनी म्हटले.
भाजपनेही सोशल मीडियाच्या माध्यमातून समाजवादी पक्षावर जोरदार टीका केली. अखिलेश यादव यांच्या स्वागताच्या उत्साहात एका १२ वर्षीय बालकाचा बळी गेल्याचा आरोप भाजपने केला. कार्यकर्त्यांना नागरिकांच्या सुरक्षेची जाणीव नसल्याचा दावा करत या घटनेला समाजवादी पक्षाची बेफिकिरी जबाबदार असल्याचे पक्षाने म्हटले आहे. बालकाच्या मृत्यूच्या घटनेवर तीव्र नाराजी व्यक्त करत भाजपने अखिलेश यादव यांच्यावर राजकीय टीका केली.
दरम्यान, मुख्यमंत्री योगी यांच्या आरोपांना अखिलेश यादव यांनी प्रत्युत्तर दिले. एखाद्या निष्पाप बालकाचा अपघाती मृत्यू होणे ही अत्यंत वेदनादायक घटना असून, या दुःखात संपूर्ण समाज सहभागी असल्याचे त्यांनी सांगितले. मृत बालकाच्या कुटुंबीयांप्रती संवेदना व्यक्त करत समाजवादी पक्षाच्या कार्यकर्त्यांना संबंधित कुटुंबाची भेट घेऊन शक्य ती सर्व मदत करण्याच्या सूचना दिल्याचेही त्यांनी स्पष्ट केले.
या घटनेवर राजकारण करणाऱ्यांनी लखनऊमधील अग्निकांडावेळी मृत तरुणाच्या दुःखी आईशी कशा प्रकारे वर्तन केले होते, याची आठवण ठेवावी, असा टोला अखिलेश यादव यांनी लगावला. दुःखाच्या प्रसंगी संवेदना व्यक्त करण्याचे नाटक करणाऱ्यांचे खरे स्वरूप जनतेला समजले असल्याचेही त्यांनी म्हटले.
दुसरीकडे, गोरखपूरमधील एका कार्यक्रमात बोलताना मुख्यमंत्री योगी आदित्यनाथ यांनी समाजवादी पक्षावर पुन्हा जोरदार हल्ला चढवला. समाजवादी पक्ष म्हणजे गुंडगिरी आणि अराजकतेचे प्रतीक असल्याची टीका त्यांनी केली. २०१७ पूर्वी उत्तर प्रदेशात वन, खनिज आणि पशुधन माफियांचे वर्चस्व असल्याचा आरोप करत राज्यातील पूर्वीच्या परिस्थितीवरही त्यांनी भाष्य केले. रोड शोमध्ये एका अल्पवयीन मुलाचा मृत्यू झाल्याचा उल्लेख करत त्यांनी समाजवादी पक्षाच्या कार्यपद्धतीवर प्रश्न उपस्थित केले.
या घटनेमुळे उत्तर प्रदेशातील राजकीय वातावरण अधिक तापले असून भाजप आणि समाजवादी पक्षामध्ये आरोप-प्रत्यारोप सुरू झाले आहेत. मात्र, राजकीय वादाच्या पार्श्वभूमीवर निष्पाप बालकाच्या मृत्यूमुळे त्याच्या कुटुंबावर दुःखाचा डोंगर कोसळला आहे.