महाज्योती परीक्षेच्या केंद्रावर तांत्रिक गोंधळ; विद्यार्थ्यांचा खोळंबा, परीक्षा रद्द

Image Source:(Internet)

पुणे : महाज्योती अंतर्गत घेण्यात येत असलेल्या शिष्यवृत्ती परीक्षेला तांत्रिक अडचणींचा मोठा फटका बसला. पुण्यातील आंबेगाव परिसरातील परीक्षा केंद्रावर अनेक विद्यार्थ्यांना संगणकावर लॉग-इन करताच आले नाही. काही विद्यार्थ्यांचे लॉग-इन झाल्यानंतरही सिस्टीम अचानक बंद पडणे आणि लॉग-आऊट होण्याच्या समस्यांमुळे परीक्षा सुरळीतपणे पार पडू शकली नाही. अखेर निर्माण झालेल्या गोंधळामुळे परीक्षा रद्द करण्याचा निर्णय घेण्यात आला.

परीक्षेच्या नियोजित वेळेपासूनच केंद्रावर तांत्रिक अडथळे सुरू झाले होते. अनेक विद्यार्थ्यांचे संगणक सुरू होत नसल्याने त्यांना परीक्षा देता आली नाही. केंद्रावरील शेकडो विद्यार्थ्यांपैकी मोजक्याच विद्यार्थ्यांना सिस्टीममध्ये प्रवेश मिळाला. मात्र, लॉग-इन झालेल्या विद्यार्थ्यांनाही काही वेळातच सिस्टीम बंद पडणे किंवा आपोआप लॉग-आऊट होण्याच्या समस्येला सामोरे जावे लागले.

तांत्रिक बिघाडामुळे परीक्षेचा वेळ वाया गेल्याने विद्यार्थ्यांमध्ये नाराजीचे वातावरण निर्माण झाले. परीक्षा व्यवस्थापनाच्या नियोजनावर प्रश्न उपस्थित करत विद्यार्थ्यांनी संताप व्यक्त केला. अचानक उद्भवलेल्या या तांत्रिक गोंधळामुळे विद्यार्थ्यांचे मोठे नुकसान झाल्याचा आरोप करण्यात आला.

दरम्यान, परिस्थिती नियंत्रणाबाहेर गेल्यानंतर प्रशासनाने परीक्षा रद्द करण्याचा निर्णय घेतला. विद्यार्थ्यांनी संपूर्ण प्रकाराची चौकशी करून परीक्षा पुन्हा योग्य नियोजनासह आणि कोणताही तांत्रिक अडथळा न येता घेण्याची मागणी केली आहे.