अनिल सोले यांच्या अपक्ष उमेदवारीवर दयाशंकर तिवारींचे भाष्य; भाजप सुधाकर कोहळेंसोबत!

 

 Image Source:(Internet)

 

नागपूर : नागपूर विभाग पदवीधर मतदारसंघाच्या निवडणुकीत माजी आमदार अनिल सोले (Anil Sole) यांनी अपक्ष म्हणून निवडणूक लढवण्याची भूमिका घेतल्याने भाजपमधील मतभेद समोर आले आहेत. या घडामोडींवर प्रतिक्रिया देताना नागपूर शहर भाजप अध्यक्ष दयाशंकर तिवारी यांनी सोले यांच्या निर्णयामुळे पक्षावर परिणाम होणार नसल्याचे सांगितले. भाजपचा पूर्ण पाठिंबा सुधाकर कोहळे यांनाच असल्याचे त्यांनी स्पष्ट केले.

 

भाजपने सुधाकर कोहळे यांची उमेदवारी जाहीर केल्यानंतर अनिल सोले यांनी नाराजी व्यक्त करत अपक्ष निवडणूक लढवण्याचा निर्णय घेतला. पक्षासोबत संवाद होत नसल्याच्या सोले यांच्या आरोपांवरही तिवारी यांनी प्रतिक्रिया दिली. उमेदवारीच्या मुद्द्यावरून पक्षात नाराजी असली, तरी भाजपची भूमिका स्पष्ट असून पक्ष कोहळे यांच्या पाठीशी ठामपणे उभा असल्याचे त्यांनी सांगितले.

 

दरम्यान, अनिल सोले यांनी आपला निर्णय बदलून पुन्हा भाजपमध्ये सक्रिय व्हावे, असे आवाहन तिवारी यांनी केले. पक्षाशी असलेले संबंध कायम ठेवून त्यांनी पुन्हा पक्षाच्या प्रवाहात यावे, अशी अपेक्षाही त्यांनी व्यक्त केली.

 

नागपूर पदवीधर मतदारसंघातील उमेदवारीवरून भाजपमध्ये निर्माण झालेल्या परिस्थितीमुळे राजकीय चर्चांना वेग आला आहे. सोले यांच्या अपक्ष उमेदवारीबाबत पक्षातील नेत्यांच्या प्रतिक्रिया समोर येत असून, आगामी काळात या प्रकरणात काय घडामोडी होतात, याकडे लक्ष लागले आहे.