जनतेचा कौल स्वीकारा; धुळ्यातून मुख्यमंत्री फडणवीसांचा विरोधकांवर घणाघात

 

 Image Source:(Internet)

राज्यात होऊ घातलेल्या महानगरपालिका निवडणुकांच्या पार्श्वभूमीवर महायुतीचा प्रचार जोरात सुरू असून मुख्यमंत्री देवेंद्र फडणवीस (Fadnavis) हे धुळे जिल्ह्याच्या दौऱ्यावर आले होते. या दौऱ्यात झालेल्या प्रचारसभेत त्यांनी विकासकामांचा लेखाजोखा मांडत विरोधकांच्या भूमिकेवर तीव्र शब्दांत टीका केली.

 

सभास्थळी मोठ्या संख्येने नागरिक उपस्थित असल्याचे नमूद करत मुख्यमंत्री फडणवीस यांनी पत्रकार दिनानिमित्त पत्रकार बांधवांना शुभेच्छा दिल्या. तसेच मंत्री गिरीश महाजन यांनी जिल्ह्यात केलेल्या कार्याचा उल्लेख करत त्यांनी गेल्या काही दिवसांत मोठ्या प्रमाणात मेहनत घेतल्याचे सांगितले. धुळे जिल्ह्यात महिला उमेदवारांचा सहभाग लक्षणीय असल्याचेही त्यांनी अधोरेखित केले.

 

बिनविरोध निवडून आलेल्या नगरसेवकांवरून होणाऱ्या टीकेला प्रत्युत्तर देताना मुख्यमंत्री म्हणाले की, लोकसभा किंवा विधानसभेत बिनविरोध निवड लोकशाहीस पूरक मानली जाते, मात्र धुळ्यात जनतेने चार नगरसेवक बिनविरोध निवडून दिल्यावर काही जण लोकशाहीवर प्रश्नचिन्ह उपस्थित करत आहेत. हा दुटप्पीपणा जनतेला दिसत असल्याचे त्यांनी स्पष्ट केले.

 

धुळे शहराच्या विकासाविषयी बोलताना मुख्यमंत्री फडणवीस म्हणाले की, भाजपच्या कार्यकाळात शहरात मूलभूत सुविधा बळकट करण्यात आल्या आहेत. लवकरच महानगरपालिकेचा रौप्य महोत्सव साजरा होणार असून प्रत्येक घरात स्वच्छ पिण्याचे पाणी पोहोचवण्याचे उद्दिष्ट सरकारने ठेवले आहे. १४३ कोटी रुपयांच्या पाणीपुरवठा प्रकल्पाचे काम सध्या प्रगतीपथावर असल्याची माहितीही त्यांनी दिली.

 

यावेळी त्यांनी पुणे शहरातील विकास प्रकल्पांवरही भाष्य केले. पुण्यात मोठ्या प्रमाणावर पाणीपुरवठा सुधारणा योजना राबवण्यात येत असून, शहरात सीसीटीव्ही यंत्रणेद्वारे सुरक्षिततेवर भर दिला जात आहे. कृत्रिम बुद्धिमत्तेचा वापर करून पुणे अधिक सुरक्षित बनवण्याचे नियोजन सुरू असल्याचे त्यांनी सांगितले. तसेच पुणे मेट्रो प्रकल्पामुळे शहरातील वाहतूक व्यवस्थेत मोठा बदल होणार असल्याचा विश्वास त्यांनी व्यक्त केला.