नागपूर मनपा निवडणूक: भाजपची मुसंडी, शंभरी ओलांडत महापालिकेच्या सत्तेकडे वाटचाल

 

 Image Source:(Internet)

नागपूर (Nagpur) महानगरपालिका निवडणुकीच्या मतमोजणीला आज सकाळी सुरुवात होताच भाजपने स्पष्ट आघाडी घेत सर्वांचे लक्ष वेधून घेतले आहे. सुरुवातीच्या फेऱ्यांमध्येच भाजपने बहुमताचा आकडा पार केला असून महापालिकेतील सत्तेचा मार्ग जवळपास निश्चित झाला आहे. मुख्यमंत्री देवेंद्र फडणवीस यांचा बालेकिल्ला समजल्या जाणाऱ्या नागपूरमध्ये भाजपचे तब्बल १०१ उमेदवार विजयी दिशेने वाटचाल करत आहेत, तर काँग्रेसला केवळ २५ जागांवर समाधान मानावे लागले आहे.

 

काल शांततेत पार पडलेल्या मतदानानंतर आज सकाळी १० वाजता मतमोजणीला प्रारंभ झाला. मतमोजणी प्रक्रिया पारदर्शक आणि अडथळ्याविना पार पडावी यासाठी प्रशासनाने व्यापक तयारी केली आहे. या कामासाठी ३,५७९ केंद्राध्यक्ष आणि १०,७३७ मतदान अधिकारी नियुक्त करण्यात आले आहेत.

 

शहरातील सर्व मतमोजणी केंद्रांवर कडक सुरक्षा व्यवस्था लागू करण्यात आली असून, कायदा व सुव्यवस्था राखण्यासाठी मोठ्या प्रमाणावर पोलिस बंदोबस्त ठेवण्यात आला आहे. निकालांचे कल स्पष्ट होत असताना नागपूर शहरासह राज्यातील राजकीय वर्तुळाचे लक्ष अंतिम निकालांकडे लागले आहे. आजच नागपूर महानगरपालिकेच्या सत्तेचे अंतिम चित्र स्पष्ट होणार आहे.