ठाकरे बंधूंच्या एकत्र येण्याचा सर्वाधिक फटका राज ठाकरेंनाच; मुख्यमंत्री फडणवीसांचे सूचक भाष्य

 

 Image Source:(Internet)

राज्यातील स्थानिक स्वराज्य संस्थांच्या निवडणुकांमुळे राजकारण चांगलेच तापले आहे. १५ जानेवारी रोजी २९ महानगरपालिकांसाठी मतदान होणार असून प्रचाराची धग अंतिम टप्प्यात पोहोचली आहे. या पार्श्वभूमीवर मुख्यमंत्री देवेंद्र फडणवीस (Fadnavis) यांनी एका वृत्तवाहिनीला दिलेल्या मुलाखतीत ठाकरे बंधूंच्या युतीवर आणि विरोधकांच्या ताकदीवर थेट भाष्य केले.

 

बिनविरोध निवडणुकांवर होत असलेल्या टीकेला उत्तर देताना फडणवीस म्हणाले की, केवळ भाजपचेच उमेदवार बिनविरोध निवडून आले, हा आरोप चुकीचा आहे. अनेक ठिकाणी अपक्ष तसेच इतर पक्षांचे उमेदवारही निवडून आले आहेत. काही मतदारसंघांत विरोधी पक्षांना उमेदवारच उभे करता आले नाहीत, हेच त्यांची संघटनात्मक कमजोरी दर्शवते, असा टोला त्यांनी लगावला.

 

कल्याण–डोंबिवलीचा संदर्भ देत फडणवीस म्हणाले की, मागील निवडणुकांच्या तुलनेत भाजपची ताकद अधिक वाढली आहे, तर विरोधकांकडे नेतृत्व आणि कार्यकर्त्यांची कमतरता जाणवते. याच कारणामुळे अनेक प्रभागांत निवडणूकच न लढवता माघार घ्यावी लागल्याचे त्यांनी सूचित केले.

 

ठाकरे बंधूंच्या संभाव्य युतीवर बोलताना मुख्यमंत्री म्हणाले की, भाजप आणि मनसे यांच्यात वैचारिक जुळवणूक शक्य नाही. मराठी मुद्द्यांवर बोलणे वेगळे असले, तरी आक्रमक आणि हिंसक भूमिका भाजपला मान्य नाही. त्यामुळे युती न होण्यामागे केवळ राजकीय नव्हे, तर वैचारिक कारणेही असल्याचे त्यांनी स्पष्ट केले.

 

या युतीबाबत भविष्यवाणी करताना फडणवीस म्हणाले की, ठाकरे बंधू एकत्र आले तरी त्याचा राजकीय लाभ मर्यादित असेल. उलट, या समीकरणाचा सर्वाधिक फटका राज ठाकरेंनाच बसण्याची शक्यता आहे, असे मत त्यांनी व्यक्त केले.

 

प्रचाराच्या मुद्द्यावरून विरोधकांवर टीका करताना फडणवीस म्हणाले की, अनेक नेते मुंबई आणि नाशिकच्या बाहेर फारसे फिरलेले दिसत नाहीत. कार्यकर्त्यांना बळ देण्यासाठी सातत्याने मैदानात उतरणे आवश्यक असते, अन्यथा पक्षाची ओळख आणि ताकद हळूहळू कमी होत जाते, असा सूचक इशाराही त्यांनी दिला.स्थानिक स्वराज्य संस्थांच्या निवडणुकांच्या तोंडावर मुख्यमंत्र्यांच्या या विधानांमुळे राजकीय चर्चांना नव्याने धार मिळाली आहे.