ओबीसी नेते लक्ष्मण हाके वादग्रस्त वक्तव्यामुळे अडचणीत; परळी व नेकनूरमध्ये गुन्हे नोंद

मराठा आरक्षणाच्या पार्श्वभूमीवर राज्य सरकारने हैदराबाद गॅझेट लागू केल्यानंतर ओबीसी समाजाने जोरदार विरोध दर्शवला आहे. या आंदोलनाच्या लाटेत ओबीसी नेते लक्ष्मण हाके (Laxman Hake) यांनी शिंगरवाडी फाटा (ता. गेवराई) येथे सभा घेऊन भाषण केले. मात्र, त्या भाषणात मराठा समाजातील मुलींविषयी केलेल्या वादग्रस्त वक्तव्यामुळे त्यांच्याविरुद्ध संतापाची लाट उसळली आहे.

 

या वक्तव्यानंतर परळी शहर पोलीस ठाण्यात हाके यांच्या विरोधात गुन्हा दाखल करण्यात आला आहे. तक्रारदार देवराव रामराव लुगडे यांच्या निवेदनावरून BNS 1994, 196, 997, 298, 299 आणि 124 अशा विविध कलमांखाली अदखलपात्र गुन्हा नोंदवला गेला. गुन्हा दाखल होताच संतप्त मराठा बांधव मोठ्या संख्येने पोलीस ठाण्यासमोर जमा झाले. “हाके यांना अटक करा, जिल्ह्यातून हद्दपार करा” अशा घोषणांनी परिसर दणाणून गेला.

 

हाके यांच्या अडचणीत आणखी भर टाकणारी तक्रार नेकनूर पोलीस ठाण्यात दाखल झाली. जगन्नाथ घोडके यांनी दिलेल्या तक्रारीवरून पुन्हा एकदा गुन्हा नोंद झाला. अशा प्रकारे गेल्या दोन दिवसांत लक्ष्मण हाके यांच्याविरोधात तीन अदखलपात्र गुन्हे दाखल झाले आहेत.

 

हाके यांच्या वक्तव्यामुळे मराठा समाजात प्रचंड असंतोष पसरला आहे. अनेक ठिकाणी आक्रमक निदर्शने सुरू झाली आहेत. दुसरीकडे, हैदराबाद गॅझेटचा जीआर रद्द करण्याच्या मागणीसाठी ओबीसी समाजदेखील मोठ्या संख्येने रस्त्यावर उतरला आहे. त्यामुळे राज्यात पुन्हा एकदा मराठा-ओबीसी संघर्षाचे चित्र दिसत आहे.