रक्षाबंधनाचा उत्सव पंतप्रधान निवासस्थानी; विद्यार्थिनी व ब्रह्मकुमारी संस्थेच्या बहिणींनी बांधली मोदींना राखी

 

 (Image Source-Internet)

देशभरात शनिवारी रक्षाबंधनाचा (Raksha Bandhan) सण पारंपरिक स्नेहभाव आणि जल्लोषात साजरा झाला. भावाबहिणीच्या नात्याचे प्रतीक असलेल्या या सणानिमित्त पंतप्रधान नरेंद्र मोदींनीही आपल्या 7, लोक कल्याण मार्गावरील निवासस्थानी खास कार्यक्रम आयोजित करून सहभागी झाले.

 

सकाळपासूनच विविध शाळांमधील विद्यार्थिनी पंतप्रधानांच्या भेटीसाठी पोहोचल्या होत्या. त्यांनी मोदींना राखी बांधत सणाच्या शुभेच्छा दिल्या. या वेळी पंतप्रधानांनी विद्यार्थिनींशी संवाद साधून त्यांच्या शिक्षणाविषयी विचारपूस केली, तसेच हलक्या-फुलक्या गप्पांतून आनंदाचे वातावरण निर्माण केले. विद्यार्थिनींच्या चेहऱ्यावरचा आनंद आणि अभिमान स्पष्ट जाणवत होता.

 

विद्यार्थिनींबरोबरच ब्रह्मकुमारी या आध्यात्मिक संस्थेच्या बहिणींनीही पंतप्रधानांना राखी बांधून सणाचा उत्साह वाढवला. मोदींनी त्यांच्याशीही आत्मीयतेने चर्चा करत बंधुत्व, एकात्मता आणि संस्कारांचे महत्त्व अधोरेखित केले.

 

रक्षाबंधनाच्या निमित्ताने मोदींनी सोशल मीडियावरूनही देशवासीयांना शुभेच्छा देत, “हा सण परस्पर प्रेम, स्नेह आणि रक्षणभावना दृढ करणारा आहे,” असा संदेश दिला. पंतप्रधानांच्या निवासस्थानी झालेल्या या कार्यक्रमाने भारतीय संस्कृतीतील सण-परंपरेचे आणि भावनिक नात्यांचे सुंदर चित्र उभे केले.