नागपुरात १ सप्टेंबरपासून भटक्या कुत्र्यांना मोफत रेबीज लस मोहीम

 

 (Image Source-Internet)

शहरात वाढत्या कुत्रा चावल्याच्या घटनांच्या पार्श्वभूमीवर आणि सर्वोच्च न्यायालयाच्या हस्तक्षेपानंतर, सेव्ह स्पीचलेस ऑर्गनायझेशन (SSO) या संस्थेने भटक्या (Stray dogs) कुत्र्यांसाठी रेबीजविरोधी लसीकरण मोहीम हाती घेतली आहे. स्मिता मिरे यांच्या नेतृत्वाखालील ही मोहीम ‘मिशन रेबीज’ या उपक्रमाअंतर्गत १ सप्टेंबर ते २८ सप्टेंबर २०२५ या कालावधीत राबवली जाणार आहे.

 

या मोहिमेद्वारे नागपूर शहरातील भटक्या कुत्र्यांना मोफत रेबीज लसीकरण केले जाणार असून, प्राणीसंवर्धनासोबत नागरिकांच्या सुरक्षेलाही चालना मिळणार आहे. संस्थेच्या वतीने सांगण्यात आले की, भटक्या कुत्र्यांचे व्यवस्थापन हे लसीकरण आणि नसबंदीमधूनच शक्य आहे; निर्दयता किंवा त्यांची हटवणूक हा उपाय नाही.

 

संस्थेच्या स्वयंसेवकांकडून नागरिकांच्या विनंतीनुसार सोसायट्या व परिसरात जाऊन लसीकरण केले जाईल. तसेच, कुत्र्यांना तणाव नको म्हणून शक्य तिथे जाळ्यांचा वापर टाळून लसीकरण करण्याचा निर्णय घेण्यात आला आहे.

 

स्मिता मिरे यांनी नागरिकांना आवाहन करताना सांगितले, “प्रत्येक लसीकरण केलेला कुत्रा म्हणजे नागरिकांसाठी कमी रेबीजचा धोका आणि प्राण्यांसाठी अधिक चांगली काळजी. नागपूरकरांनी या मोहिमेत मोठ्या प्रमाणात सहभागी व्हावे.”