लाडकी सूनबाई योजना’वर अद्याप अंतिम निर्णय नाही; उपमुख्यमंत्र्यांकडून स्पष्टता

 

 (Image Source-Internet)

महाराष्ट्रातील महिलांसाठी सुरु केलेल्या ‘लाडकी बहीण योजना’ने राज्यभरातील लाखो महिलांना आर्थिक सहाय्य पुरवले आहे. या योजनेअंतर्गत आतापर्यंत २.२५ कोटींहून अधिक लाभार्थ्यांना १३ हप्त्यांमध्ये एकूण १९,५०० रुपये दिले गेले आहेत. पात्र महिलांना दर महिन्याला १५०० रुपये मिळत आहेत, ज्यामुळे त्यांच्या जीवनमानात सुधारणा झाली आहे.शिवसेना शिंदे गटाने ‘लाडकी सूनबाई योजना’ (Ladki Soonbai Yojana) घराघरांपर्यंत पोहोचवण्याचे प्रयत्न सुरु केले आहेत. प्रत्येक शाखा किंवा विभागीय कार्यालयातून लाभार्थींना मदत मिळेल, तसेच हेल्पलाइन नंबरवर सूनांवर होणाऱ्या अन्यायाबाबत तक्रार करता येईल.

 

ठाण्यात कार्यक्रमात उपमुख्यमंत्री एकनाथ शिंदे म्हणाले, “जशी मुलीची काळजी घेतली जाते, तशीच सून ही लाडकी व्हावी. ती माझ्या लाडक्या बहिणीसारखी आहे. कुणीही अन्याय करत असेल तर शिवसेनेशी संपर्क करा.”

 

तथापि, उपमुख्यमंत्री आणि अर्थमंत्री अजित पवार यांनी स्पष्ट केले की, ‘लाडकी सूनबाई योजना’साठी अद्याप कोणताही औपचारिक निर्णय झाला नाही. पवार म्हणाले, “सरकारचे निर्णय मंत्रिमंडळात मंजूर झाल्यानंतरच सार्वजनिक केले जातील. जनतेच्या हितासाठी योग्य ते निर्णय घेण्यास आम्ही नेहमीच सज्ज आहोत.”

 

दरम्यान सध्या ‘लाडकी बहीण योजना’ सुरू असून, ‘लाडकी सूनबाई योजना’ फक्त प्रस्तावाच्या आणि चर्चेच्या स्तरावर आहे; औपचारिक घोषणा येण्याची प्रतीक्षा आहे.