माजी मंत्री बच्चू कडू यांना न्यायालयाने 3 महिन्यांचा कारावासासह 10 हजार रुपयांचा दंडही ठोठावला
Total Views |
(Image Source-Internet)
मुंबई :
महाराष्ट्राचे माजी मंत्री आणि अचलपूरचे अपक्ष आमदार ओमप्रकाश उर्फ बच्चू कडू (Bachchu Kadu) यांना मुंबई सत्र न्यायालयाने तीन महिन्यांच्या साध्या तुरुंगवासाची शिक्षा सुनावली आहे. त्याचबरोबर 10 हजार रुपयांचा दंडही ठोठावण्यात आला आहे.
ही कारवाई सप्टेंबर 2018 मधील घटनेप्रकरणी झाली. त्या वेळी कडू यांनी आयएएस अधिकारी प्रदीप पी.के. यांच्या कार्यालयात जबरदस्ती प्रवेश करून त्यांना धमकावल्याचा आरोप होता. पीडित अधिकाऱ्याने मरीन ड्राइव्ह पोलिस ठाण्यात तक्रार नोंदवली होती.
निकाल देताना न्यायालयाने नमूद केले की, आमदार असूनही कडू यांनी योग्य कायदेशीर मार्गाने तक्रार करण्याऐवजी अधिकाऱ्याला कार्यालयात जाऊन धमकावले, जे गंभीर गुन्हा आहे. अशा शिक्षा झाल्यास प्रामाणिकपणे काम करणाऱ्या सरकारी कर्मचाऱ्यांचा आत्मविश्वास वाढेल, असेही न्यायालयाने स्पष्ट केले.
याशिवाय, ई-रिक्षा उत्पादक कंपनीने अपंगांना निकृष्ट दर्जाच्या रिक्षा पुरवल्याच्या आरोपावरून कडू यांनी कंपनीतील एका कर्मचाऱ्याला चापट मारल्याची नोंद आहे.
या प्रकरणात कडू यांना भारतीय दंड संहितेच्या कलम 353 (सरकारी कर्मचाऱ्यावर हल्ला) आणि 506 (गुन्हेगारी धमकी) अंतर्गत दोषी ठरवण्यात आले आहे. मात्र, उच्च न्यायालयात अपील दाखल करेपर्यंत त्यांची शिक्षा स्थगित ठेवण्यात आली असून, त्यांना जामीनही मंजूर झाला आहे.
