नागपूरच्या विकासात नागरिकांचा सक्रिय सहभाग आवश्यक;महाराष्ट्र दिनानिमित्त आयुक्त डॉ. चौधरी यांचे विधान

(Image Source : Internet) 

महाराष्ट्र दिन (Maharashtra Day) आणि आंतरराष्ट्रीय कामगार दिनानिमित्त नागपूर महानगरपालिका मुख्यालयात ध्वजारोहण समारंभ पार पडला. या प्रसंगी मनपा आयुक्त डॉ. अभिजित चौधरी यांच्या हस्ते ध्वज फडकवण्यात आला.

 

आपल्या भाषणात डॉ. चौधरी यांनी महाराष्ट्र राज्याच्या स्थापनेमागील स्वातंत्र्यसैनिकांच्या योगदानाला अभिवादन केले आणि उपस्थितांना शुभेच्छा दिल्या. त्यांनी सांगितले की, महाराष्ट्राने विविध क्षेत्रांत – स्वातंत्र्य चळवळ, सामाजिक सुधारणा, साहित्य, विज्ञान, कला व उद्योग – नेतृत्व केले आहे.

 

राज्याची अर्थव्यवस्था 1 ट्रिलियन डॉलरच्या दिशेने वाटचाल करत असून, या वाटचालीत नागपूरची भूमिका अत्यंत महत्त्वाची ठरणार आहे, असे त्यांनी नमूद केले. नागपूर हे राज्याचे "ग्रोथ सेंटर" आहे, हे अधोरेखित करत त्यांनी शहराच्या सर्वांगीण प्रगतीसाठी नागरिकांनी प्रशासनाला सहकार्य करावे, असे आवाहन केले.

 

समारंभात विशेष पाहुण्यांचा सत्कारही करण्यात आला. अग्निशमन दलातील जवान, शिवछत्रपती पुरस्कार प्राप्त खेळाडू आणि तेजस्विनी महिला मंचाच्या किरण मुंधडा यांना त्यांच्या उल्लेखनीय कार्यासाठी गौरवण्यात आले.