राज ठाकरेंचा एकत्र येण्यासाठी प्रस्ताव, उद्धव ठाकरे यांनी ठेवली ‘ही’ अट

 

 (Image Source : Internet)

राज ठाकरे (Raj Thackeray) यांनी शिवसेनेशी पुन्हा एकत्र येण्याबाबत प्रस्ताव दिला असून, उद्धव ठाकरे यांनी त्याला प्रतिसाद दिला आहे. तरीही, एकत्र येण्यापूर्वी उद्धव ठाकरे यांनी एक महत्त्वाची अट ठेवली आहे. शिवसेनेच्या कामगार सेनेच्या कार्यक्रमात उद्धव ठाकरे यांनी याबाबत आपली भूमिका स्पष्ट केली.

 

राज ठाकरे यांनी महेश मांजरेकरांना दिलेल्या मुलाखतीत शिवसेनेसोबत एकत्र येण्याची तयारी दर्शवली. त्यांनी सांगितले की, मराठी माणसाच्या अस्तित्वासाठी एकत्र येणं महत्त्वाचं आहे आणि सर्व मराठी नेत्यांनी एकत्र येऊन एक पक्ष स्थापन केला पाहिजे. राज ठाकरे यांच्या या प्रस्तावाला उद्धव ठाकरे यांनी होकार दिला, पण त्यांनी स्पष्टपणे सांगितले की, एकत्र येण्याची इच्छा आहे, पण फक्त इच्छा पुरेशी नाही. त्यासाठी योग्य कृतीची आवश्यकता आहे.

 

उद्धव ठाकरे यांनी सांगितले की, ‘‘महाराष्ट्राच्या हिताला विरोध करणाऱ्यांना आम्ही स्वीकारणार नाही. एकत्र येण्यापूर्वी, महाराष्ट्राच्या भल्यासाठी सर्वांनी एकमताने काम करणे आवश्यक आहे’’ असे ते म्हणाले. भूतकाळात ज्या वेळेस उद्योग गुजरातला गेले, त्यावेळी विरोध झाला असता, तर आज महाराष्ट्रात वेगळा राजकारणाचा चेहरा दिसला असता, असे त्यांनी सांगितले.

 

उद्धव ठाकरे यांनी शिवसेनेच्या स्थापनेचा उद्देशही स्पष्ट केला – ‘‘मराठी माणसाच्या हक्काचे रक्षण’’ . तसेच, त्यांनी सत्ताधाऱ्यांवर टीका करत सांगितले की, मुंबईसारख्या महत्वाच्या ठिकाणी उद्योग अदानींसारख्या लोकांकडे वळवण्याचे षड्यंत्र सुरू आहे.

 

उद्धव ठाकरे यांनी राज ठाकरे यांना स्पष्टपणे सांगितले की, एकत्र येण्यासाठी महाराष्ट्राच्या हितावर कोणत्याही प्रकारचा आक्षेप न घेता, सर्वांनी एकत्र येणं आवश्यक आहे.