जर आम्ही विवाह केला असता तर…;माधुरीसोबत लग्न तुटल्याच्या चर्चेबाबत सुरेश वाडकरांची पहिली प्रतिक्रिया
Total Views |
Image Source:(Internet)
मुंबई :
बॉलिवूडची ‘धकधक गर्ल’ माधुरी (Madhuri) दीक्षित ही भारतीय चित्रपटसृष्टीतील तेजस्वी आणि लोकप्रिय अभिनेत्री म्हणून ओळखली जाते. नृत्यकौशल्य, अभिनय आणि मोहक व्यक्तिमत्त्वामुळे तिने अगणित प्रेक्षकांची मने जिंकली. तिच्या करिअरइतकंच तिच्या वैयक्तिक आयुष्याबद्दलही गॉसिपची रेलचेल कायम दिसली आहे.
माधुरीचं नाव अनेक कलाकारांसोबत जोडून चर्चेत राहिलं. कधी संजय दत्तसोबतची तिची जवळीक, तर कधी एका राजघराण्यात सून होण्याची गमावलेली संधी—माधुरीबाबतच्या अफवा कधीच कमी पडल्या नाहीत. याच दरम्यान एक नाव पुन्हा पुन्हा समोर आलं — प्रख्यात गायक सुरेश वाडकर.
अप्रतिम आवाजाने रसिकांना भुरळ घालणारे सुरेश वाडकर यांच्या गाण्यांनी दशकानुदशके संगीतप्रेमींना मंत्रमुग्ध केलं आहे. मात्र एकेकाळी माधुरी दीक्षितचं लग्न सुरेश वाडकरांसोबत ठरणार असल्याच्या चर्चेला मोठी उधाण आली होती. वाडकरांनी हे नातं स्वीकारलं नाही, अशी माहिती अनेक वर्षांपासून प्रसारित होत आहे.
अलीकडे ‘साहित्य तक’ला दिलेल्या मुलाखतीत सुरेश वाडकरांना या विषयावर थेट प्रश्न विचारण्यात आला. माधुरीच्या कुटुंबीयांनी लग्नाचा प्रस्ताव मांडला होता का, अशी चौकशी होताच वाडकर हसत म्हणाले,
“नेमकं काय झालं होतं हे फक्त देव जाणतो. पण ही चर्चा कोणी सुरू केली हे आजही कळलेलं नाही. ही अफवा अजूनही लोकांच्या मनात तरंगते. जर माझं आणि माधुरीचं लग्न झालं असतं, तर आज ती माझ्या सोबत असती.”
माधुरी त्या काळी चित्रपटसृष्टीत स्थिरस्थावर नव्हती. तिचे वडील सुयोग्य वर शोधत असतानाच सुरेश वाडकर यांच्याकडे प्रस्ताव घेऊन गेले, असं म्हटलं जातं. मात्र माधुरी अतिशय बारीक असल्याचं कारण देत वाडकरांनी हे स्थळ नाकारल्याची चर्चा त्या काळी होती. त्यामुळे अभिनेत्रीच्या वडिलांना मोठा धक्का बसल्याचं सांगितलं जातं.
यानंतर काही वर्षांनी, १९८४ मध्ये ‘अबोध’ चित्रपटातून माधुरीने सिनेसृष्टीत पाऊल ठेवलं आणि पुढे ती बॉलिवूडची सर्वात यशस्वी अभिनेत्री ठरली. आजही माधुरी दीक्षित सौंदर्य, अभिनय आणि लोकप्रियतेच्या बाबतीत अव्वल स्थानावर आहे.
