नागपूर हिवाळी अधिवेशनासाठी अंतिम तयारी; आंदोलनांच्या संभाव्यतेमुळे पोलिस बंदोबस्त कडक
Total Views |
Image Source:(Internet)
नागपूर :
येत्या आठवड्यात सुरू होणाऱ्या हिवाळी अधिवेशनासाठी (Winter session) प्रशासनाने पूर्ण तयारी पूर्ण केली आहे. रवी भवनातील मंत्र्यांचे निवासस्थान आणि आमदारांच्या निवासस्थानी स्वागतासाठी विशेष सजावट करण्यात आली असून, मंत्री आणि आमदार ७ तारखेपासून नागपूरमध्ये हजर होण्यास सुरुवात करणार आहेत.
अधिवेशनाच्या पार्श्वभूमीवर विविध संघटनांकडून मोठ्या आंदोलनांच्या अपेक्षा व्यक्त होत असून, अनेक संघटनांनी मोर्चे, धरणे आणि उपोषण यासाठी परवानगी मागितली आहे. त्यामुळे अधिवेशनाच्या पहिल्या दिवशी विधानभवन परिसरात मोठ्या प्रमाणावर आंदोलन होण्याची शक्यता आहे, ज्यामुळे सुरक्षा यंत्रणाही तैनात करण्यात आली आहे.
शिवसेना (ठाकरे गट)चे प्रमुख उद्धव ठाकरे ११ व १२ डिसेंबरला हिवाळी अधिवेशनात सहभागी होणार असून, ते या काळात राजकीय बैठकाही घेण्याची शक्यता आहे. शिक्षक संघटनांनी टीईटी परीक्षेच्या अनिवार्यतेवर संताप व्यक्त केला असून, शासनाकडून समाधानकारक उत्तर न मिळाल्यास अधिवेशनादरम्यान मोठ्या प्रमाणात शिक्षक मोर्चा काढण्याचा इशारा दिला आहे.
माजी गृहमंत्री अनिल देशमुख यांनी अधिवेशनाचा कालावधी कमी केल्याबद्दल सरकारवर संताप व्यक्त करत विदर्भातील शेतकऱ्यांच्या समस्यांवर पुरेशी चर्चा न झाल्याचा आरोप केला आहे. विदर्भाच्या समस्यांसाठी किमान तीन आठवड्यांचे अधिवेशन आवश्यक असल्याचे त्यांनी स्पष्ट केले. सध्याच्या राजकीय आणि सामाजिक वातावरणामुळे नागपूरमध्ये प्रशासनाची जबाबदारी अधिक वाढली आहे.
