कर्मचाऱ्यांना दिलासा; ८व्या वेतन आयोगामुळे केंद्रीय कर्मचाऱ्यांच्या पगारात वाढ होण्याची शक्यता

 

Image Source:(Internet) 

केंद्रीय कर्मचाऱ्यां आणि पेन्शनधारकांसाठी आनंददायक वार्ता समोर आली आहे. केंद्र सरकारने अलीकडेच ८वा वेतन आयोग (8th Pay Commission) स्थापन केला असून, त्याच्या शिफारशींमुळे कर्मचाऱ्यांच्या पगारात मोठ्या प्रमाणात वाढ होण्याची शक्यता आहे. सध्या असे अंदाज व्यक्त केले जात आहेत की, मूळ वेतनात ३० ते ५० टक्क्यांपर्यंत वाढ होऊ शकते.

 

आयोगाने आपले काम सुरू केले असून, वेतन, भत्ते, पेन्शन आणि सेवा अटींचा सखोल आढावा घेऊन २०२७ पर्यंत सरकारला आपला अहवाल सादर करण्याचा मानस आहे. पगारवाढीच्या प्रक्रियेत ‘फिटमेंट फॅक्टर’ या घटकाला महत्त्वाचे स्थान आहे. मीडिया रिपोर्ट्सनुसार, या फॅक्टरची किंमत १.८६ ते २.५७ दरम्यान असू शकते, ज्यावरून पगारवाढीचा अंदाज बांधला जात आहे. जर हा गुणांक उच्च ठेवला गेला, तर वेतनात ५० टक्क्यांपर्यंत वाढ होऊ शकते, मात्र यामुळे सरकारच्या खर्चावर मोठा ताण येण्याची शक्यता देखील आहे.

 

पेन्शनधारकांनाही या निर्णयाचा फायदा मिळणार असून, त्यांची मासिक पेन्शनदेखील वाढण्याची अपेक्षा आहे. नवीन वेतन आणि पेन्शन योजना २०२७-२८ च्या आसपास लागू होण्याची शक्यता वर्तवली जात आहे. वाढती महागाई आणि आर्थिक दबाव लक्षात घेता, कर्मचाऱ्यांच्या वेतनवाढीची मागणी अनेक वर्षांपासून होती, आणि ८व्या वेतन आयोगाच्या शिफारशींनी ही अपेक्षा पूर्ण होण्याची आशा निर्माण झाली आहे.

 

केंद्र सरकारच्या या निर्णयामुळे केंद्रीय कर्मचाऱ्यांच्या आर्थिक स्थितीत सुधारणा होण्यास मदत होईल. या संदर्भात लवकरच अधिकृत घोषणा होण्याची शक्यता आहे.