नागपूरमधील हिवाळी अधिवेशनाचा समारोप; पुढचे अधिवेशन २३ फेब्रुवारीपासून मुंबईत सुरू होणार

 

 Image Source:(Internet)

महाराष्ट्र विधान परिषदेचे हिवाळी अधिवेशन (Winter session) आज संपन्न झाले. अधिवेशनाच्या शेवटी पुढील सत्र २३ फेब्रुवारी २०२६ रोजी मुंबईत सुरू होणार असल्याची अधिकृत घोषणा करण्यात आली.

 

या अधिवेशनात विधानपरिषदेने एकूण ४८ तास १६ मिनिटे कामकाज केले. त्यात केवळ ४० मिनिटे वेळ वाया गेला, तर दररोज सरासरी ६ तास ५३ मिनिटे सभागृहात कामकाज सुरु राहिले. सभागृह सदस्यांची एकूण उपस्थिती ८८.६८% तर सरासरी उपस्थिती ७५.४७% इतकी नोंदली गेली.

 

अधिवेशनादरम्यान ७ बैठकांचा कार्यक्रम पार पडला, तसेच ३ शोक प्रस्ताव सादर करण्यात आले. प्रश्नोत्तर सत्रात १,९०० पेक्षा जास्त तारांकित प्रश्न नोंदवले गेले, त्यापैकी २८० प्रश्नांना मंजुरी मिळाली. याच कालावधीत ६ अध्यादेशही विधानपरिषदेसमोर मांडण्यात आले.

 

सभागृहात एकूण ४७२ सूचना मांडण्यात आल्या, त्यापैकी ९७ सूचनांना मान्यता देण्यात आली तर २५ सूचनांवर सविस्तर चर्चा झाली. औचित्याने एकूण ११० मुद्दे मांडले गेले, त्यापैकी ८७ मुद्द्यांवर सभागृहात चर्चाही झाली.

 

कायद्यांच्या कामकाजात विधानपरिषदेने ४ शासकीय विधेयकांना मंजुरी दिली. तसेच विधानसभेत आधीच मंजूर झालेली १४ विधेयके विधानपरिषदेनेही मान्यता दिली.

 

एकूणच, नागपूर येथील हिवाळी अधिवेशनात वेळेचा मर्यादित वापर होत, तरीही कामकाज सुरळीत आणि व्यवस्थित पार पडले, असे निरीक्षण करण्यात आले.