अरुणाचल प्रदेशात भीषण दुर्घटना; मजूर वाहतूक करणारा ट्रक दरीत कोसळला; 17 जणांचा मृत्यू

 

 Image Source:(Internet)

अरुणाचल प्रदेशच्या (Arunachal Pradesh) अंजॉ जिल्ह्यात आज पहाटे भयावह अपघात झाला. हैयूलियांग–चगलागाम इंडो-चीन सीमेवर रस्ते बांधणीसाठी मजुरांना घेऊन जाणारा ट्रक खोल दरीत कोसळला. २१ मजुरांपैकी तब्बल १७ जण दगावल्याची भीती व्यक्त करण्यात येत असून, स्थानिक प्रशासनाने तातडीने बचाव कार्य सुरू केले आहे.

 

अंजाव जिल्ह्याचे उपायुक्त मिलो कोजिन यांनी अपघाताची माहिती देताना सांगितले की, हा भाग अत्यंत डोंगराळ आणि नागमोडी वळणांनी भरलेला आहे. रस्ता अरुंद, चढ-उतार असलेला असून, वाहनचालकांचे नियंत्रण सहज सुटण्याची शक्यता असते. प्राथमिक माहितीनुसार, चालकाचा ट्रकवरील ताबा सुटल्याने वाहन खोल दरीत कोसळले.

 

दुर्घटनानंतर स्थानिक नागरिक सर्वप्रथम घटनास्थळी धावून आले आणि त्यांनी मदतकार्य सुरू केले. त्यानंतर जिल्हा प्रशासन, पोलीस, आपत्ती व्यवस्थापन दल आणि लष्कराची पथके तात्काळ घटनास्थळी पोहोचली. दरी अतिशय खोल असल्याने बचावकार्य आव्हानात्मक ठरत आहे. अनेक मजूर दरीच्या तळाशी अडकले असून त्यांच्यापर्यंत पोहोचण्यासाठी विशेष यंत्रणा वापरावी लागत आहे.

 

ट्रकचा अक्षरशः चेंदामेंदा झाला असून काही मजुरांचे मृतदेह विद्रूप अवस्थेत आढळत असल्याची माहिती प्रशासनाकडून देण्यात आली. अपघातस्थळाभोवती भूस्खलनाचा धोका असल्याने बचाव पथकांना अधिक खबरदारीने काम करावे लागत आहे.

 

इंडो-चीन सीमेवरील रस्ते प्रकल्पांमध्ये दररोज मोठ्या संख्येने मजूर काम करतात. या परिसरातील रस्ते अत्यंत धोकादायक असल्याने पूर्वीही अशा दुर्घटना घडल्या आहेत. खराब हवामान, अरुंद रस्ते आणि दरीकाठचा उतार यामुळे या भागात अपघातांची शक्यता कायम असते.

 

दरम्यान, या भीषण अपघाताच्या चौकशीचे आदेश देण्यात आले आहेत. ट्रकचा वेग, रस्त्याची दुरवस्था किंवा यंत्रणेतील त्रुटी यांपैकी नेमके कारण काय, याचा तपास होणार आहे. प्रशासनाने मृतांच्या कुटुंबीयांशी संपर्क साधायला सुरुवात केली असून सर्वतोपरी मदत देण्याचे आश्वासन दिले आहे.

 

ही दुर्घटना सीमावर्ती भागातील रस्ते सुरक्षेबाबत गंभीर प्रश्न उपस्थित करते.