विधानसभेत तुकाराम मुंढे प्रकरणावर खडाजंगी; आमदाराला धमकी प्रकरणी कारवाईचे मुख्यमंत्र्यांचे आश्वासन

 

 Image Source:(Internet)

सनदी अधिकारी तुकाराम मुंढे (Tukaram Mundhe) यांच्या समर्थकाकडून भाजपचे आ. कृष्णा खोपडे यांना फोनवरून दिलेल्या धमकीचा मुद्दा मंगळवारी विधानसभा अधिवेशनात चांगलाच तापला. या प्रकरणावर सत्ताधारी आमदारांनी जोरदार आक्रमक भूमिका घेत कामकाज काही काळासाठी ठप्प केले.

 

औचित्याचा मुद्दा उपस्थित करताना आ. खोपडे यांनी सरकारचे लक्ष या घटनेकडे वेधले. नागपूर ‘स्मार्ट सिटी’ प्रकल्पातील alleged गैरव्यवहारावरील आपली लक्षवेधी मांडल्यानंतर मुंढे समर्थकाने धमकी दिल्याचा आरोप त्यांनी केला. स्मार्ट सिटीमध्ये सुमारे २० कोटी रुपयांचे अनियमित पेमेंट आणि महिला अधिकाऱ्यांशी झालेल्या दुरव्यवहाराची दोन प्रकरणे पोलिसांकडे नोंद झाली होती, असेही त्यांनी सभागृहात नमूद केले.

 

या तणावपूर्ण वातावरणात मुख्यमंत्री देवेंद्र फडणवीस यांनी हस्तक्षेप करत, आमदाराला धमकी देणाऱ्या व्यक्तीवर कठोर कारवाई केली जाईल, असे आश्वासन दिले. तसेच तुकाराम मुंढे प्रकरणातील सर्व माहिती मागवून, तथ्यांवर आधारित निवेदन सभागृहात सादर केले जाईल, असेही त्यांनी स्पष्ट केले.

 

दरम्यान, काँग्रेसचे गटनेते आ. विजय वडेट्टीवार यांनी मुंढे यांचा बचाव करत सरकारला वस्तुस्थितीची काटेकोर पडताळणी करण्याचे आवाहन केले. तत्कालीन आयुक्तांच्या अहवालात मुंढे निर्दोष असल्याचे नमूद होते, तसेच महिला आयोगाने तक्रारदारांनाच जबाबदार धरल्याचे त्यांनी सभागृहात सांगितले.

 

मुंढे प्रकरणी विधानसभेत झालेल्या या जोरदार वादामुळे प्रशासनातील निर्णयप्रक्रिया, अधिकार-राजकारण यांवरील चर्चा पुन्हा एकदा चांगलीच तापली आहे.