कांदिवलीत ५ वर्षांच्या चिमुरडीवर अत्याचार; १६ वर्षीय मुलाच्या कृत्याने परिसरात संतापाची लाट

Image Source:(Internet) 

कांदिवली (Kandivali) पश्चिमातील लालजी पाडा परिसरात मानवतेला लज्जास्पद ठरणारी घटना घडली असून, केवळ पाच वर्षांच्या निरागस मुलीवर शेजारी राहणाऱ्या एका १६ वर्षीय मुलाकडून अत्याचार झाल्याची धक्कादायक माहिती समोर आली आहे. या प्रकरणाने संपूर्ण परिसर हादरून गेला असून रहिवाश्यांमध्ये भीती आणि रोषाचे वातावरण आहे.

 

मिळालेल्या माहितीनुसार, पीडित मुलगी घराजवळ खेळत असताना आरोपी किशोराने तिला आपल्या खोलीत नेले. काही वेळातच मुलीची अवस्था बिघडल्याचे लक्षात येताच शेजाऱ्यांनी तिला तातडीने शताब्दी रुग्णालयात दाखल केले. डॉक्टरांनी मुलीवर त्वरित उपचार सुरू केले असून तिची प्रकृती लक्षात घेऊन विशेष देखरेख ठेवण्यात येत आहे.

 

घटनेनंतर पोलिसांनी संबंधित किशोराला ताब्यात घेऊन चौकशी सुरू केली आहे. चौकशीदरम्यान त्याने एका गोळीचे सेवन केल्याचा उल्लेख करत, भान हरपल्याचा दावा केला. त्याने नेमकी कोणती गोळी घेतली आणि ती त्याच्या हातात कशी आली याबाबत पोलिसांनी स्वतंत्र तपास सुरू केला आहे.

 

या अमानुष कृत्यामुळे लालजी पाड्यात नागरिकांचा संताप शिगेला पोहोचला आहे. आरोपीला कठोर शिक्षा व्हावी, तसेच बालकांवरील अत्याचारांच्या घटनांना आळा बसण्यासाठी अधिक कडक कायदेशीर पावले उचलावीत, अशी जोरदार मागणी स्थानिकांनी केली आहे.