‘लाडकी बहीण’ योजनेतील लाभार्थ्यांसाठी दिलासादायक बातमी; ऑक्टोबरचा निधी आजपासून जमा सुरू

Image Source:(Internet) 

महाराष्ट्रातील महिलांसाठी आनंदाची बातमी समोर आली आहे. राज्य सरकारच्या ‘मुख्यमंत्री माझी लाडकी बहीण’ योजनेचा (Ladki Bahin scheme) ऑक्टोबर महिन्याचा हफ्ता आजपासून पात्र लाभार्थ्यांच्या बँक खात्यात जमा होण्यास सुरुवात झाली असल्याची माहिती महिला व बालकल्याण मंत्री आदिती तटकरे यांनी दिली आहे.

 

आदिती तटकरे यांनी सामाजिक माध्यम ‘एक्स’ (माजी ट्विटर) वर पोस्ट करत सांगितले की, “महिला सक्षमीकरणाच्या दिशेने सुरू असलेली ‘लाडकी बहीण’ योजना म्हणजे समाजातील परिवर्तनाची अखंड क्रांती आहे. ऑक्टोबर महिन्याचा सन्मान निधी वितरित करण्याची प्रक्रिया आजपासून सुरू झाली असून, पात्र लाभार्थ्यांना लवकरच त्यांच्या बँक खात्यात रक्कम मिळणार आहे.”

 

या योजनेअंतर्गत पात्र महिलांना दरमहा १५०० रुपये सन्मान निधी म्हणून दिले जातात. मात्र गेल्या काही दिवसांपासून E-KYC प्रक्रियेमध्ये आलेल्या तांत्रिक अडचणींमुळे हफ्ता वितरणात विलंब झाला होता. OTP न येणे, पडताळणी न होणे अशा समस्या अनेक महिलांनी मांडल्या होत्या.

 

या संदर्भात आदिती तटकरे यांनी सांगितले की, सरकारने सर्व तांत्रिक अडचणी दूर करून E-KYC प्रक्रिया अधिक सुलभ व सुलभ केली आहे. नागरिकांना आता कोणत्याही विलंबाशिवाय नोंदणी करता येईल.

 

राज्य सरकारने स्पष्ट निर्देश दिले आहेत की, 19 नोव्हेंबरपर्यंत सर्व लाभार्थ्यांनी E-KYC प्रक्रिया पूर्ण करणे अनिवार्य आहे. ही प्रक्रिया https://ladakibahin.maharashtra.gov.in या संकेतस्थळावर ऑनलाइन करता येईल.

 

जुलै 2024 पासून सुरू झालेल्या या योजनेमुळे राज्यातील महिलांना आर्थिक बळ मिळत असून, त्यांच्या स्वावलंबनाकडे मोठं पाऊल उचललं जात आहे.

 

राज्यातील लाखो महिलांसाठी हा ऑक्टोबरचा सन्मान निधी दिवाळीपूर्वीचा सुखद दिलासा ठरला आहे.