पाकिस्तानकडून गुप्त अणु चाचण्या; डोनाल्ड ट्रम्प यांचा धक्कादायक खुलासा

 

 Image Source:(Internet)

माजी अमेरिकन राष्ट्राध्यक्ष डोनाल्ड ट्रम्प (Donald Trump) यांनी केलेल्या एका विधानाने जागतिक पातळीवर खळबळ उडवली आहे. ट्रम्प यांनी असा दावा केला आहे की, “पाकिस्तान गुप्तपणे अणु चाचण्या करत आहे.” या वक्तव्यामुळे दक्षिण आशियात, विशेषतः भारतात, चिंता व्यक्त केली जात आहे.

 

एका मुलाखतीत ट्रम्प म्हणाले, “जगातील अनेक देश अण्वस्त्रांच्या चाचण्या घेत आहेत, पण त्या गोपनीय ठेवतात. रशिया आणि चीन नियमितपणे परीक्षणे करतात, मात्र त्याबद्दल सार्वजनिकरीत्या बोलत नाहीत. आम्ही अमेरिकन लोक पारदर्शक आहोत, म्हणूनच आम्ही जे करतो ते जगासमोर मांडतो.”

 

ट्रम्प यांनी पुढे स्पष्ट केले, “उत्तर कोरिया निश्चितच अणु चाचण्या करत आहे, तसेच पाकिस्तानही त्याच मार्गावर आहे. त्यामुळे अमेरिका आता गप्प बसणार नाही. जेव्हा इतर देश आपली अणुशक्ती वाढवत आहेत, तेव्हा आम्हालाही आपली ताकद दाखवणं गरजेचं आहे.”

 

ध्यानात घेण्यासारखी गोष्ट म्हणजे पाकिस्तानने शेवटचं अधिकृत अणु परीक्षण १९९८ मध्ये केलं होतं. मात्र ट्रम्प यांच्या मते, त्यानंतरही त्या देशाने भूमिगत गुप्त चाचण्या सुरूच ठेवल्या आहेत. त्यांनी रशिया आणि चीनकडूनही अशाच गुप्त हालचाली सुरू असल्याचं सांगितलं.

 

अमेरिकेच्या ‘सीबीएस ६० मिनिट्स’ या कार्यक्रमात बोलताना ट्रम्प म्हणाले, “रशिया आणि उत्तर कोरिया सातत्याने अण्वस्त्र प्रणालींची तपासणी करत आहेत. त्यामुळे अमेरिकेलाही आता ३३ वर्षांनी अणु परीक्षण पुन्हा सुरू करावं लागेल.”

 

अमेरिकेने शेवटचं अणु परीक्षण १९९२ मध्ये केलं होतं. त्यानंतर शीतयुद्ध संपल्यानंतर सर्व चाचण्या स्थगित करण्यात आल्या होत्या. परंतु ट्रम्प यांच्या म्हणण्यानुसार, पेंटागनला त्यांनी आता निर्देश दिले आहेत की, “रशिया आणि चीनच्या वाढत्या अणुशक्तीला प्रत्युत्तर देण्यासाठी अमेरिकेलाही आपली क्षमता सिद्ध करावी लागेल.”

 

या दाव्यांमुळे आंतरराष्ट्रीय पातळीवर पुन्हा एकदा तणाव निर्माण होण्याची शक्यता व्यक्त केली जात आहे. तज्ज्ञांच्या मते, पाकिस्तानकडून अणु चाचण्या झाल्यास दक्षिण आशियातील अणुसंतुलन गंभीरपणे बिघडू शकतं आणि त्याचा थेट परिणाम भारतावर होऊ शकतो.